Azərbaycan,Bakı/müxbir Trend S.Babayeva/ Azərbaycanda "quş qripi"nin xəbərdarlığı üzrə növbəti monitorinqin tarixi müəyyənləşib. Azərbaycan Kənd Təsərrüfatı yanında Dövlət Baytarlıq Xidmətinin məlumatına əsasən, monitorinq fevralın 26-da başlayacaq və bir həftə davam edəcək.
Monitorinq baytarlıq xidməti, ekologiya, səhiyyə nazirliklərinin nümayəndələrindən ibarət olan xüsusi komissiya və ovçular cəmiyyəti tərəfindən köçəri quşların müvəqqəti yaşadığı ehtimalı olan - Pirallahı, Abşeron yarımadalarında, milli park ərazilərində və Xəzər dənizinin sahilyanı xəttində aparılcaq.
Əvvəlki monitorinqin nəticələri bu yaxınlarda ictimaiyyətin diqqətinə çatdırılacaq.
Virusun ölkə ərazisinə keçməsinin qarşısını almaq üçün bütün sərhəd baytarlıq məntəqələri gücləndirilmiş iş rejimində işləyir, ölkədə vəhşi quşların ovuna, satışına, istifadəsinə qoyulmuş qadağa qüvvədədir.
Beynəlxalq Epizootik Büronun məlumatına əsasən, yalnız 2007-ci ilin fevralında "quş qripi" virusu Tayland, Pakistan, Sloveniya, Böyük Britaniya, Türkiyə, Macarıstan, Koreya, Rusiya, Yaponiya və Laosda aşkar olunub.
