Azərbaycan, Bakı /müx. Trend İ.Xəlilova/ Azərbaycanın Dövlət Əmlakının idarəedilməsi üzrə Dövlət Komitəsi "Qax-konserv" Açıq Səhmdar Cəmiyyətinin 30,06 faiz aksiyalarının investisiya müsabiqəsi vasitəsi ilə satıldığını bəyan edib. Verilən məlumata görə, investor istehsalatın bərpası məqsədilə müəssisəyə üç ay ərzində 222,3 min manat qoymaq öhdəliyi götürüb.
Bu vəsaitlər müəssisədə bərpa-təmir işlərinin aparılması və müasir avadanlığın alınması üçün sərf olunacaq. Nəticədə bu, "Qax-konserv"də istehsal prosesini yeniləşdirməyə imkan verəcək.
İnvestisiya proqramı çərçivəsində burada qazanxa tikintisi, iki konserv sexinin birləşdirilməsini və mürəbbə bişirilməsi üzrə sexdə yeni avadanlığın quraşdırılması nəzərdə tutulur. Yatırılacaq investisiyalar hesabına həmçinin müasir standartlara uyğun qoz ləpəsi sexinin inşası və tütün sexinin istehsalat gücünün artırılması planlaşdırılır.
İnvestor eyni zamanda dövlət büdcəsinə 26 min manat köçürmək öhdəliyi götürüb. İstehsal prosesinin bərpası ilə bağlı aparılacaq tədbirlər nəticəsində 20 yeni iş yerinin açılması və sosial yönümlü tədbirlərin həyata keçirilməsi gözlənilir.
2007-ci il yanvarın 1-nə olan məlumata görə, müəssisənin nizamnamə kapitalı 640 543 manata bərabərdir. Müəssisənin öhdəlikləri 263 392 manat, debitor borcları isə 230 050 manat təşkil edir. "Qax-konserv" 1987-ci ildə istifadəyə verilib. Müəssisədə 23 nəfər çalışır.
