Azərbaycan, Bakı/ Trend müxbir C.Babayeva/ Dünya Bankı və Azərbaycan hökuməti arasında kiçik şəhərlərin su təchizatı və kanalizasiya sisteminin yaxşılaşdırılması layihəsi üzrə kredit razılaşması 2007-ci ilin iyul-avqust aylarında imzalana bilər. Bunu cümə günü Azərsu SC-nin rəhbəri Nizaməddin Rzayev bildirib.
Onun sözlərinə görə, 20 şəhərdə (Ağstafa, Biləsuvar, Goranboy, Qəbələ, Quba, Saatlı, Oğuz, Xanlar, Tovuz, Zaqatala, Hacıqabul, Qazax, Qax, Mingəçevir, Sabirabad, Samux, Şəmkir, Tərtər və Naxçıvan Muxtar Respublikasının Babək və Şərur rayonları) su şəbəkəsi və kanalizasiya sisteminin bərpasına yönəlmiş texniki iqisadi əsaslandırma (TİƏ) işləri aparılır.
DB-nin Bakı ofisinin məlumatına görə, layihə üçün bank 230 mln. dollar vəsait ayıracaq. Vəsait Beynəlxalq Yenidənqurma və İnkişaf Bankının xətti ilə (5 il ödəmə möhlətilə 20 illiyinə, faiz dərəcələri hələ ki, müzakirə olunur) hər biri 115 mln. dollar olan iki tranşla ayrılacaq.
DB-nin Azərbaycanla tərəfdaşlıq strategiyasına (2007-2010-cu illər) uyğun olaraq kreditin 2007-ci maliyyə ilində, iyunun sonuna kimi təsdiq olunacağı gözlənilir. 2009 və 2010-cu ildə milli sutəchizatı və kanalizasiya sisteminin inkişafına daha 200 mln. dollar ayrılacaq.