Azərbaycan, Bakı, 25 sentyabr / Trend , müxbir İ.Xəlilova/ Azərbaycan Dövlət Neft Fondunun (ARDNF) icraçı direktoru Şahmar Mövsümovla Trend -ın müsahibəsi.
- Azərbaycanın valyuta ehtiyatları nə dərəcədə səmərəli idarə edilir və bu sistemin təkmilləşdirilməsi üçün hansı tədbirləri yerinə yetirmək lazımdır?
- Azərbaycanın valyuta ehtiyatları əsasən Milli Bank və ARDNF tərəfindən idarə edilir. ARDNF-in sərmayə fəaliyyəti öz valyuta ehtiyatlarının real dəyərinin saxlanılması və daimi gəlir əldə etmək məqsədilə onların idarəsindən uzunmüddətli sərmayələrin yatırılmasına yönəlib. Fondun vəsaitlərinin səmərəli idarə edilməsi müxtəlif maliyyə alətlərinə (istiqrazlar, depozitlər, səhmlər, həmçinin alternativ sərmayələr) elə həcmdə vəsaitlərin yatırılmasını nəzərdə tutur ki, bu zaman sərmayə portfelinin minimal dəyişkənliyi ilə maksimal gəlirlilik əldə edilir.
Hazırki mərhələdə Fond mühafizəkar sərmayə siyasətinə meyl göstərir. Belə ki, ARDNF-in aktivlərinin əsas hissəsi təsbit edilmiş faiz dərəcəsi və yüksək reytinqi olan qiymətli kağızlara yatırılıb ki, bu da sabit gəlir və eyni zamanda nisbətən aşağı gəlirlilik səviyyəsini təmin edir. Valyuta ehtiyatlarının idarəsinin səmərəliliyini artırmağa yönəlmiş növbəti addım ARDNF-in sərmayə portfelində böyük potensial gəlirliliyi olan daha riskli aktivlərin (səhmlər kimi) payının artırılmasıdır.
Paralel olaraq ARDNF-in aktivlərinin idarə edilməsi prosesinin daha çox avtomatlaşdırılması üzrə iş davam etdirilir. Bizdə artıq sərmayə portfelinin avtomatlaşdırılmış idarəetmə sistemi quraşdırılıb, yaxın vaxtlarda risklərin idarə edilməsi sistemini müasirləşdirməyi planlaşdırırıq.
- Azərbaycanda Çin, Sinqapurda olduğu kimi, ölkənin valyuta ehtiyatlarının idarə edilməsinin səmərəliliyini artırmaq üçün sərmayə şirkətinin yaradılmasına ehtiyac varmı?
- Azərbaycanın Neft Fondu elə bu funksiyaları həyata keçirir.
- Gələcəkdə ölkənin valyuta ehtiyatlarının həcminin artması ilə onlardan hansı məqsədlər üçün istifadə etmək olar? Ortamüddətli perspektivdə ölkənin valyuta ehtiyatlarının hansı səviyyəyədək artacağı gözlənilir?
- Yaxın beş il ərzində ARDNF-ə $100 mlrd. həcmində vəsaitin daxil olacağı gözlənilir. Vəsaitlərin müəyyən hissəsi əsasən keyfiyyətli müasir infrastrukturun yaradılmasının maliyyələşdirilməsinə sərf ediləcək. Lakin vəsaitlərin böyük hissəsi saxlanılacaq və Azərbaycandan kənarda sərmayə aktivlərinə yatırılacaq.
- Avro və digər valyutaların xeyrinə valyuta səbətini ABŞ-ın pul vahidinə bağlamaqdan imtina etmək barədə planlar varmı? Bu gün AMB və ARDNF-in valyuta ehtiyatlarının strukturu necədir?
- ARDNF-in valyuta səbəti ayrıca bir valyutaya bağlı deyil. Təsdiq edilmiş sərmayə siyasətinə əsasən, ARDNF-in valyuta ehtiyatlarının strukturu belədir: 50 faiz ї ABŞ dolları, 40 faiz ї avro, 5 faiz ї funt sterlinq, daha beş faiz ї digər valyutalar.
ARDNF uzunmüddətli sərmayə məqsədləri olan sərmayə fondu olduğu halda, AMB-nin əsas funksiyası ölkənin maliyyə bazarında sabitliyi dəstəkləməkdir. Gördüyünüz kimi, ARDNF və AMB-nin funksiyaları müxtəlifdir və bu, öz növbəsində bu iki təşkilatın sərmayə strategiyalarında müxtəlifliyi şərtləndirir.
Bununla əlaqədar, ARDNF və AMB həm öz ehtiyatlarının valyuta tərkibinin formalaşdırılması prosesində, həm də xarici menecerlərin seçimində demək olar ki, müstəqildirlər.
Müəlliflə əlaqə saxlamaq üçün elektron ünvan: [email protected]