Azərbaycan, Bakı, 30 oktyabr / Trend /
"Neka-Cask" boru kəmərinin tikintisi üçün İran və Rusiya şirkətləri arasında danışıqlar aparılır. Bu barədə İranın neft nazirinin müavini və Milli Neft Emalı Şirkətinin direktoru Nurəddin Şahnazizadə bildirib. Məlumatı İranın MEHR informasiya agentliyi yayıb.
"Neka-Cask" boru kəmərinin reallaşdırılması və yeni neft emalı zavodlarının tikintisi üçün kifayət qədər maliyyə dəstəyi yoxdur. 1680 kilometr uzunluğunda boru kəmərinin tikintisi üçün biz müxtəlif xarici şirkətlərlə danışıqlar aparmışıq. Son zamanlarda biz Rusiya və Çin şirkətləri ilə danışıqlar aparırıq", - Şahnazizadə deyib.
Onun sözlərinə görə, Rusiya ilə ilkin danışıqlar hələ nəticə verməyib, lakin layihənin həyata keçirilməsi üçün vacib olan sənədlər artıq Rusiya tərəfinə verilib. Rusiya tərəfi də İranın təkliflərini nəzərdən keçirir.
Şahnazizadə deyib ki, "Neka-Cask" boru kəmərinin reallaşdırılması üçün 3,3 milyard dollar həcmində vəsait tələb olunur.
İranın Neft Nazirliyinin hesablamalarına görə, "Neka-Cask" boru kəməri 2013-cü ildə istifadəyə verilməlidir.