Azərbaycan, Bakı, 18 noyabr / Trend , müxbir E.İsmayılov/
Hazırda "Azəriqaz" İstehsalat Birliyi yanında "Bakqaz" (Bakıda qazın paylanması və satışı) idarəsi tərəfindən Bakı şəhərinin qaz sisteminə sutkalıq qaz verilişi 6,55 milyon kubmetr təşkil edir. Oktyabrın əvvəlində bu göstərici 3,45 milyon kubmetr təşkil edib. Bu barədə çərşənbə günü idarədəki mənbədən bildirilib. Bir müddət əvvəl "Azəriqaz" QSC İB qismində ARDNŞ-nin tərkibinə daxil edilib.
"Havaların soyuması ilə əlaqədar qaz istehlakı artıb. Hazırda bu göstərici 6,551 milyon kubmetr təşkil edir", - mənbə deyib.
Mənbənin əvvəlcədən bildirdiyi kimi, yanvar-oktyabr aylarında paytaxtın qaz sisteminə 1,9 milyard kubmetr məişət qazı verilib.
Oktyabr ayında paytaxtın qaz sisteminə sentyabr ayında verilən 108 milyon kubmetrə nisbətdə 123,6 milyon kubmetr qaz verilib. Avqustda şəhərin qaz sisteminə 104 milyon kubmetr, iyulda təxminən 109 milyon kubmetr, iyunda 114 milyon kubmetrdən çox, mayda isə təqribən 141 milyon kubmetr qaz verilib.
Ötən il İB Bakının qaz sisteminə 2,45 milyard kubmetr qaz verib.
2008-ci ildə "Bakqaz" şəhərin qaz sisteminə qaz verilişinin mövsümi rejimindən (yay və qış mövsümü) tamamilə imtina edib. Bundan sonra verilən qazın həcmi istehlakçıların tələbatı ilə müəyyən edilir. Əvvəl yay mövsümündə qazın sutkalıq verilişi 3-4 milyon kubmetr, qışda isə bu rəqəm 10-13 milyon kubmetr təşkil edirdi.
Məqalə müəllifi ilə əlaqə ünvanı: [email protected]