Azərbaycan, Bakı, 06 yanvar / Trend , müxbir V.Şərifov/
"Azərbaycanın "Kürsəngi- Qarabağlı" quru yataqlarında neft hasilatı ilə məşğul olan "Salyan Oil" əməliyyat şirkəti yanvarın 12-də Bakıda əməliyyat komitəinin iclasını keçirəcək. Burada büdcə, şirkətin 2010-cu ilə olan kapital və əməliyyat xərcləri və yeni quyuların sayı müəyyən ediləcək", - bu barədə neft-qaz bazarında məlumatı olan mənbə çərşənbə günü məlumat verib.
2010-cu ilə olan İlkin İşçi Proqramı "Kürsəngi" və "Qarabağlı" yataqlarında layihə dərinliyi orta hesabla 4500 metr olan 2 istismar quyusunun qazılmasını nəzərdə tutur. 2009-cu ildə Salyan Oil müqavilə sahəsində 4 istismar quyusu qazıb.
Hal-hazırda bu yataqlardan hasil edilən neft hasilatı sutkada 640 ton təşkil edir. Bir neçə il əvvəl bu göstırici 1050 ton olub. Bu da çoxdan işlənilən yataqlarda neft hasilatının təbii azalması və çox dərin olan yeni quyuların qazılması ilə izah edilir.
Yataqlar Azərbaycanın salyan rayonunda (Bakıdan 150 kilometr məsafədə) yerləşir. Bir sıra mütəxəssislərin fikrincə, müqavilə ərazisində qalan neft ehtiyyatları 150 milyon tondan artıqdır.
"Kürsəngi-Qarabağlı" quru yatağının işlənməsi üzrə müqavilənin müddəti 25 ildir. Layihənin səhmdarları bunlardır: ARDNŞ - 50 faiz, 25 faizə malik iki Çin şirkəti - China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK).
Məqalə müəllifi ilə əlaqə ünvanı: [email protected]