Azərbaycan, Bakı, 9 iyul /Trend/
ARDNŞ-nin tullantılarının utilizasiyası və tullantıların idarə olunması sisteminin yaradılması üzrə mərkəzin yenidən qurulması tenderinin qalibi ABŞ-ın MI-LLC şirkəti bu layihə çərçivəsində texniki-iqtisadi əsaslandırma (TİƏ) üzrə işlər görür. Bu barədə ARDNŞ-nin Ekologiya İdarəsinin cümə günü yayılan məlumatında deyilir.
Məlumatda qeyd olunduğuna görə, TİƏ-nin hazırlanması üzrə işlərin həyata keçirilməsi üçün MI-LLC şirkətinin nümayəndəsi yerli mütəxəssislərlə birgə təcrübə və mövcud texnologiya ilə tanışlıq məqsədilə Azərbaycanda tullantıların idarə edilməsi sahəsində fəaliyyət göstərən bəzi idarə və müəssisələrin ərazilərinə baş çəkib.
MI-LLC-nin nümayəndəsi və yerli mütəxəssislərdə "Təmiz Şəhər" ASC-yə, təhlükəli tullantıların idarə edilməsi üzrə milli mərkəzdə və BP şirkətinin "Saranca" tullantılar poliqonunda olublar.
ARDNŞ-nin tullantıların utilizasiyası üzrə mərkəzin yenidən qurulması və tullantıların idarə edilməsi üzrə sistemin yaradılması üçün TİƏ MI-LLC şirkəti və ARDNŞ arasında saziş mayın 20-də imzalanıb. Sənədi ARDNŞ-nin ekologiya məsələləri üzrə vitse-prezidenti Soltan Əliyev və MI-LLC şirkətinin vitse-prezidenti Sven Maykrans imzalayıblar.
TİƏ-nin hazırlığı çərçivəsində ARDNŞ müəssisələrinin fəaliyyəti nəticəsində yaranan tullantıların emalı üzrə müvafiq texnologiyaların seçimi və ətarf mühitə dəyən ziyanın azaldılması da nəzərdə tutulub.
Göstərilən işlər ARDNŞ və ABŞ-ın Ticarət və İnkişaf Agentliyi (USTDA) arasında 572 min dollar məbləğində imzalanan qrant sazişi əsasında həyata keçirilir. Saziş ötən il avqustun 13-də imzalanıb.
