Аzərbaycan, Bakı, 20 iyul /Trend, müxbir E.İsmayılov/
İtaliyanın ENI şirkətinin icraçı direktoru Paulo Skaroni Bakıda Türkmənistan qazının Azərbaycan ərazisi vasitəsilə nəqli və tranziti layihəsini müzakirə edib. Bu barədə çərşənbə axşamı şirkətin rəsmi saytında verilmiş məlumatda deyilir.
Hazırda icraçı direktor Paulo Skaroninin rəhbərliyi ilə ENI-nin nümayəndə heyəti Bakıda səfərdədir.
Layihə Xəzərin Azərbaycan sahili vasitəsilə bir neçə milyard kubmetr Türkmənistanın maye qazın (CNG) nəqlini və tranzitini nəzərdə tutur, buradan da qaz boru kəməri ilə digər ölkələrə nəql olunacaq. Son aylar ərzində ENI-nin icraçı direktoru Rusiya, ABŞ və Aİ ölkələrinin nümayəndələri ilə layihənin texniki, maliyyə və ticari aspektlərini müzakirə etmək üçün görüşlər keçirib.
"Bu layihə region üçün yenidir və Türkmənistanda məşəllərdə yanan qazın həcmini əhəmiyyətli dərəcədə azaltmağa imkan verəcək", - şirkətin məlumatında deyilir.
ENI əvvəllər ARDNŞ-yə Türkmənistandan 6-8 milyard kubmetr qazın nəqli layihəsində iştirak təklif etmişdi. Layihə maye qazın Xəzər dənizi vasitəsilə gəmilərlə nəqlini nəzərdə tutur. Tərəflər birgə işçi qrupunun tərkibində layihə çərçivəsində, xüsusilə də texniki, hüquqi və ticari məsələlərin bütün spektrini öyrənəcəklər.
Görüşdə həmçinin ENI-nin Azərbaycanın hasilat sektorunda iştirakı məsələsi müzakirə olunub.
Azərbaycan Sənaye və Energetika Nazirliyindən verilən məlumatda deyildiyi kimi, nazir Natiq Əliyev və ENI şirkətinin icraçı direktoru Paulo Skaroni çərşənbə axşamı Bakıda İtaliya şirkətinin Azərbaycanın dənizdəki "Dan ulduzu" və "Əşrəfi" perspektiv strukturlarının işlənməsində iştirakı imkanlarını müzakirə ediblər.
Bundan əvvəl xarici şirkətlər artıq "Əşrəfi" və "Dan ulduzu" perspektiv strukturlarında işlər həyata keçiriblər. Lakin həmin vaxt kəşfiyyat qazması karbohidrogenlərin ticari baxımdan cəlbedici həcmlərini aşkar etməyib və layihə üzrə xarici tərəfdaşlar işləməkdən imtina ediblər. 1997-ci ildə PSA tipli müqavilə imzalayan layihə iştirakçıları BP (30 faiz), UNOCAL (25,5 faiz), ARDNŞ (20 faiz), ITOCHU (20 faiz) və "Delta" (4,5 faiz) şirkətləridir.
