Azərbaycan, Bakı, 3 avqust /Trend, müxbir A.Bədəlova/
Dəniz neft-qaz sektorunda maşınqayırma üzrə xidmətlər təchizatçısı olan, Aberdin şəhərində yerləşən "EnerMech" şirkəti Azərbaycanda "bp Exploration" ilə istismar, texniki xidmət və qaldırıcı kranların yoxlanılması üzrə 8,2 milyon məbləğində müqavilə imzalayıb. Bu barədə "EnerMech" şirkətinin rəsmi saytında yerləşdirilən məlumatda deyilir.
İyulda üçillik müddətə bağlanan saziş Bakıda ofşor kran əməliyyatları üçün əsas personalın təqdim edilməsini, eləcə də qaldırıcı kranların, mühəndis və texniki xidmətlərin, ehtiyat hissələrinin, təmir, yenidənqurma və treninq xidmətlərinin təqdim edilməsini nəzərdə tutur.
İşlərin sahəsi bp-nin "Çıraq", "Mərkəzi Azəri", "Qərbi Azəri", "Şərqi Azəri" və dərinözüllü "Günəşli" yataqlarında işləyən, eləcə də Xəzərin Azərbaycan sektorunda yerləşən "Şahdəniz" qaz yatağının işlənməsi layihəsinə cəlb edilən 12 ofşor kranını əhatə edir.
"EnerMech"in idarəedici direktoru Duq Dyuqvidin sözlərinə görə, bağlanmış saziş Aberdin şirkəti üçün irəliləyişdir və beynəlxalq operatorla bağlanan ilk kran müqaviləsidir.
"Bu müqavilə strateji cəhətdən əhəmiyyətlidir; belə ki, o bizə Azərbaycanda avadanlığın və hidravliklərin icarəsi, çevik idarəetmə və treninq kimi digər xidmətlərimizi təqdim etməyə imkan verir və gələcəkdə Qazaxıstan, Türkmənistan və Gürcüstanda genişlənmək üçün tramplin rolunu oynayır", - Dyuqvid qeyd edib.
