Azərbaycan, Bakı, 18 sentyabr/Trend, müxbir E.İsmayılov/
Azərbaycan tərəfi Türkmənistana öz ərazi vasitəsilə qazın göndərilməsi üzrə orta Avropa qiymətinə yaxın müəyyən edilmiş tranzit tarifini təqdim etməyə hazırdır. Bu barədə şənbə günü ARDNŞ-in yüksək vəzifəli nümayəndəsi deyib.
Türkmənistan ərazisindəki "Şərq-Qərb" qaz kəməri layihəsi Avropaya qaz tədarükü mənbələri və marşrutlarının şaxələndirilməsinə yönəlmiş "Nabukko" qaz kəməri layihəsi ilə əlaqəlidir. Bu barədə bundan əvvəl Türkmənistan Prezidenti Qurbanqulu Berdiməhəmmədov İstanbulda Türkdilli ölkələrin dövlət başçılarının X zirvə toplantısının yekunları üzrə mətbuat konfransında bəyan edib.
"Həm şirkətimizin, həm dövlətimizin, həm də hökumətimizin mövqeyi heç vaxt dəyişməyib. Əgər bu Türkmənistana lazımdırsa, Azərbaycan Avropanın orta tranzit tariflərinə yaxın şərtlərlə müəyyən edilmiş uzunmüddətli tranzit tarifini təqdim etməyə hazırdır", - ARDNŞ-in nümayəndəsi qeyd edib.
Türkmənistanda "Şərq-Qərb" qaz kəmərinin tikintisi bir çox əməkdaşlıq məsələlərini aydınlaşdırmağa imkan verəcək və enerjidaşıyıcıların nəqli üzrə fəaliyyəti genişləndirəcək. Bu barədə cümə günü sənaye və energetika naziri Natiq Əliyev deyib.
"Mənə elə gəlir ki, bu tikintinin həyata keçməsi ilə yəqin ki, məsələlərin çoxu aydınlaşacaq, çünki Türkmənistan Prezidenti də bildirib ki, bu, fəaliyyətimizi genişləndirməyə imkan verəcək", - Əliyev qeyd edib.
Bu yaxınlarda Türkmənistanda ölkə ərazisi ilə 1000 kilometr məsafədə uzanan nəhəng "Şərq-Qərb" magistral qaz kəmərinin tikintisinə start verilib. Bu qaz kəmərinin buraxılış qabiliyyəti ildə 30 milyard kubmetr qaz təşkil edir, onun təxmini dəyəri isə iki milyard dollardır.
Layihənin əsas məqsədi Türkmənistanda vahid qaz təchizatı sisteminin yaradılması və türkmən qazının beynəlxalq bazarlara tədarükünün şaxələndirilməsidir.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.