Azərbaycan, Bakı, 10 mart /Trend, müxbir E.İsmayılov/
2010-cu ildə ARDNŞ-nin valyuta və hesablaşma hesablarına 19,1 milyard manata yaxın vəsait daxil olub. Bu barədə Azərbaycan hökumətinin ötən ilin yekunları üzrə hesabatında deyilir.
ARDNŞ-nin hesabına daxil olan vəsaitlərin ümumi həcmindən 523,8 milyon manat bank kreditlərinin payına düşüb. 13,63 milyard manata yaxın Dövlət Neft Fondunun gəlirli neftinin satışının, 100 milyon manat isə ARDNŞ-nin nizamnamə kapitalının artırılmasına daxil olan vəsaitlərin payına düşüb.
Hesabat dövrü ərzində daxil olan vəsaitlərin 1,26 milyard manatdan çoxu ölkənin dövlət büdcəsinə, 138 milyon manat Dövlət Sosial Müdafiə Fonduna, 412,4 milyon manat əməkhaqqı qismində, 6 milyon manat "Azərbaycan Dəmir Yolları" QSC-yə borcların ödənilməsi qismində ödənilib. İstifadə edilən elektrik enerjisinə görə 183,2 milyon manat ödənilib, xammal və materialların alınmasına 649,9 milyon manat, əsas vəsaitlərə 192,1 milyon manat, tikinti və təmir işlərinə 491 milyon manat xərclənib, habelə 353,9 milyon manat birgə və aidiyyəti şirkətlərə ödənilib.
Ötən il ARDNŞ tərəfindən vergi qismində 1,3 milyard manatdan çox ödəniş edilib, o cümlədən 273,1 milyon manat gəlir vergisinə, 387,8 milyon manat aksiz vergisinə, 294,2 milyon manat neft və neft məhsullarının dəyərindəki fərqə, 126,1 milyon manat mədən vergisi üzrə ödənilib.
Ötən il ARDNŞ-nin kapital qoyuluşlarının ümumi həcmi 1,26 milyard manatdan çox olub. Bundan qazma işlərinə 374,7 milyon manat, tikinti işlərinə 520,7 milyon manat, quraşdırılması tələb olunan avadanlığa 365,3 milyon manat xərclənib.
2009-cu illə müqayisədə kapital qoyuluşlarının həcmi 2010-cu ildə 484,7 milyon manat artıb. Ötən il ərzində ARDNŞ dəyəri 1,14 milyard manat olan əsas fondları istifadəyə verib. Bu, ötən ilin göstəricisindən 446,5 milyon manat çoxdur.
2010-cu ilin yekunları üzrə ARDNŞ-nin işçilərinin orta sayı 75458 nəfər təşkil edib. Bu, 2009-cu ilin analoji göstəricisindən 10136 nəfər çoxdur. 2010-cu ildə ARDNŞ-də orta aylıq məvacib 558,38 manat təşkil edib.
