Azərbaycan, Bakı, 2 avqust /Trend, müxbir E.İsmayılov/
Azərbaycanın Standartlaşdırma, Metrologiya və Patent üzrə Dövlət Komitəsinin neft və kimya sahəsində tədqiqatlarla məşğul olacaq laboratoriyasının tikintisi 2011-ci ilin sonuna kimi vaxtında başa çatacaq. Bu barədə çərşənbə axşamı Trend-ə Dövlət Komitəsindən deyiblər.
Onun sözlərinə görə, yeni laboratoriya Sumqayıt şəhərində yerləşəcək. Orada ARDNŞ-nin "Azərikimya" İstehsalat Birliyinin balansında olan kimya müəssisələri cəmləşib.
"Sumqayıtda yerləşəcək laboratoriyanın tikintisi üzrə işlər davam edir. Laboratoriya ilin sonuna tikiləcək və fəaliyyətə başlayacaq", - mənbə qeyd edib.
Bundan əvvəl komitə sədri Ramiz Həsənovun dediyinə görə, belə laboratoriyanın yaradılması respublikada istehsal edilən neft-kimya məhsullarının keyfiyyətinin yaxşılaşdırılması və onların beynəlxalq bazarlarda rəqabət qabiliyyətinin artırılması məqsədi daşıyır.
Respublikada istehsal edilən məhsulun keyfiyyətinin yaxşılaşdırılması dünya bazarında təmsil olunan malların çeşidini genişləndirməyə imkan verəcək.
Hazırda Azərbaycan 2 neft emalı zavoduna, eləcə də "Azərikimya" İstehsalat Birliyinin balansında olan kimya məhsullarının istehsalı üzrə müəssisələrə və bir qaz emalı zavoduna malikdir.
Bundan başqa, perspektivdə iri neft emalı kompleksinin yaradılması planlaşdırılır. O, NEZ-i, qaz emalı zavodunu və yüksək ekoloji standartlara uyğun neft-kimya məhsullarının istehsalı üzrə zavodu birləşdirəcək.
