Azərbaycan, Bakı, 9 avqust /Trend, müxbir E.İsmayılov/
Proqnozlara əsasən, "Azəri-Çıraq-Günəşli" yataqlar blokunun işlənməsi çərçivəsində aktivlərin rəsmən dövlətə verilməsi prosesi ilin sonunadək başa çata bilər. Bu barədə çərşənbə axşamı Azərbaycan Respublikası Dövlət Neft Fondundan (ARDNF) bildirilib.
"Hazırda bu proses çərçivəsində müzakirələr aparılır və onun [prosesin] ilin sonunadək başa çatması istisna edilmir", - fonddan qeyd edilib.
Fonddan deyildiyinə görə, AÇG layihəsi üzrə "sıfır balans"ın əldə edildiyi aktivlərin dövlət mülkiyyətinə verilməsi hüququnun rəsmiləşdirilməsi prosedurunun müəyyənləşdirilməsi məqsədilə ARDNF, ARDNŞ və bu layihənin operatoru qismində çıxış edən Britaniyanın BP şirkətinin nümayəndələrindən ibarət işçi qrup yaradılıb.
"Bu məsələ ilə bağlı müzakirələr davam edir", - fonddan bildirilib.
AÇG çərçivəsində şirkətlərin hamısı kapital qoyuluşlarını tam qaytardıqdan sonra artıq "sıfır balans" başlayıb. Bu, bütün aktivlər üzrə mülkiyyət hüququnun avtomatik olaraq dövlətin balansına verilməsi deməkdir.
Bundan əvvəl ARDNF rəhbəri Şahmar Mövsümovun dediyinə görə, aktivlərin dövlət mülkiyyətinə keçməsi üçün bu prosedurun rəsmiləşdirilməsi lazımdır. Bu halda layihənin iştirakçısı olan şirkətlər bu aktivlərdən layihənin həyata keçirilməsi müddəti başa çatana kimi istifadə edəcəklər. Bundan başqa, aktivlərin kimin balansına verilməsi ilə bağlı məsələ də həll edilir.
"Azər-Çıraq-Günəşli" neft-qaz yataqlar blokunun işlənməsinə dair müqavilə 1994-cü ildə bağlanılıb. 2010-cu ildə "Devon" AÇG-dəki 5,63 faizlik payını layihə üzrə tərəfdaşlara - BP (3,29 faiz), "Chevron" (0,99 fazi), Inpex (0,96 faiz) və Itocu (0,38 faiz) şirkətlərinə satıb.
"Azəri-Çıraq-Günəşli" yataqlar blokunun səhmdarları bunlardır: BP (operator - 35,83%), "Chevron" (11,27%), AzAÇG (11,6%), "Inpex" (10,96%), "Statoil" (8,56%), "Exxon" (8%), TPAO (6,75%), "Itochu" (4,3%), "Hess" (2,72%).
2010-cu ildə "Azəri-Çıraq-Günəşli" yataqlar blokunda 40,6 milyon ton neft hasil edilib. Bu göstərici 2009-cu ildə 40,3 milyon ton olub. 2010-cu ildə bu yataqlar blokunda sutkalıq orta hasilat 823,1 min barel təşkil edib.
