Azərbaycan, Bakı, 5 sentyabr /Trend, müxbir A.Axundov/
Gələcəkdə Azərbaycanda çaylar üzərində və su təsərrüfatı obyektlərində 173 kiçik su elektrik stansiyası (SES) tikiləcək. SES-lərin illik elektrik enerjisi istehsalı 3,2 milyard kVt/s olacaq. Həmin kiçik SES-lərdən 61-nin yaxın perspektivdə tikilməsi məqsədəuyğun hesab edilir.
Bu barədə cümə axşamı Trend-ə Sənaye və Energetika Nazirliyindən bildiriblər.
Nazirlikdən deyiblər: "Hazırda ümumi generasiya gücü 77,2 MVt olan 15 ədəd kiçik su elektrik stansiyasının tikintisi proqramı həyata keçirilir. Su elektrik stansiyalarının tikintisi dövlət əhəmiyyətli üç əsas məsələnin həll edilməsinə - sel sularının tənzimlənməsi, enerji istehsalı və yeni suvarma sistemlərinin yaradılmasına imkan verir".
Azərbaycanın ümumi enerji sistemində su elektrik stansiyalarının xüsusi çəkisi hazırda təxminən 12% təşkil edir. 2012-ci ildə istehsal olunan elektrik enerjisinin 22,98 milyard kVt/s-nın 1,82 milyard kVt/s-ı SES-lərin payına düşür.
Nazirlikdən bildiriblər ki, respublika ərazisindəki çayların hidroenerji potensialı 40 milyard kVt/s, texniki cəhətdən mümkün və iqtisadi cəhətdən əlverişli olan potensialı isə 16 milyard kVt/s qiymətləndirilir: "Bunun da 5 milyard kVt/s-ı kiçik hidroenergetikaya aiddir".
