Azərenerji SC Mingəçevirdəki Azərbaycan YES-in yenidənqurulma layihəsi üzrə texniki məsləhətçi seçimi üzrə tender elan edib. Trend in SC-nin mətbuat xidmətinə istinadən verdiyi xəbərə görə, qısa müddətdə tender prosedurlarının keçirilməsi, baş podratçının müəyyən olunması və ilin sonuna qədər AzYES-də konkret işlərin başlanılması planlaşdırılır.
Avropa Yenidənqurma və İnkişaf Bankı (AYİB) ilə layihənin kreditləşdirilməsi haqqında prinsipial razılaşma əldə olunub. Bu razılaşma üzrə tezliklə müvafiq sazişin imzalanacağı gözlənilir.
SC-in istehsal-texniki şöbəsinin rəisi Təyyar İbrahimovun sözlərinə görə, prosedur ilkin olaraq AYİB ilə razılaşdırılıb və təklifin təqdim olunması üçün beş şirkətə sorğu göndərilib. Bu şirkətlər enerji sahəsində konsaltinq xidmətləri üzrə kifayət qədər təcrübəyə malikdirlər. Bura Almaniyanın DeCON, Iattenfall, Fichtner, Finlyandiyanın Enprima və Yaponiyanın TEPCO şirkətləri aiddir.
Adları çəkilən iddiaçıların təklifləri hələ bir ay ərzində qəbul olunacaq. Sonra tender komissiyası iyulun sonuna qədər layihənin reallaşmasında konsaltinq xidmətləri göstərəcək qalibi müəyyən edəcək.
AzYES Azərbaycanda hər biri 300 MVt gücə malik 8 blokdan ibarət ən böyük elektrik stansiyasıdır. Stansiyanın yenidənqurulma layihəsinə yeddi blokun texniki cəhətdən yeniləşməsi, suburaxma sisteminin və tüstü borusunun kapital təmiri daxildir. Son bir neçə il ərzində bu məsələ üzrə AYİB ilə danışıqlar aparılıb. Bankın prezidenti Jan Lemyerin bu yaxınlardakı Bakı səfərindən və onun ölkə başçısı ilə görüşlərindən sonra məsələ Azərbaycan üçün müsbət tərəfə həll olunub.