Azərbaycan, Bakı /müx. Trend S.Əliyev/ "Oil and Gas Pro Service"
MMC birgə müəssisəsinin idarə komitəsi 2007-ci il üçün iş proqramını təsdiq edib. Bu barədə ARDNŞ-dən verilən məlumatda bildirilir.
Birgə müəssisə ARDNŞ (30 faiz), Siemens (25 faiz) və Target Petroleum (45 faiz) tərəfindən yaradılıb.
"Yaxın zamanlarda birgə müəssisə fəaliyyətə başlayacaq" - deyə ARDNŞ-dən bildiriblər.
ARDNŞ nümayəndəsinin sözlərinə görə, "Oil and Gas Pro Service" Azərbaycanın dəniz və qurudakı yataqlarında işlər aparacaq. Konkret olaraq birgə müəssisənin ARDNŞ-in böyük həcmdə neft və qaz hasil etdiyi "Günəşli" yatağında işlər görəcəyi gözlənilir.
"İlk dəfə olaraq ARDNŞ-in yataqlarında neft hasilatını artırmağa imkan verən tədbirlər həyata keçiriələcək. Söhbət qatlara ediləcək akustik təsirdən gedir" - deyə ARDNŞ-dən bildiriblər.
Birgə müəssisə geniş spektrli məsələlərlə məşğul olacaq. Buraya bütöv yatağın avadanlıqla təchizatı və dənizdəki platformaların yaxşılaşdırılması, habelə quruda görüləcək böyük işlər - qaz-kompressor təsərrüfatı, elektrik təchizatı və digərləri daxildir.
Yeraltı işlərə gəldikdə isə bu işlər ARDNŞ-in təcrübəsi, eləcə də Qərb texnologiyaları və "Target petroleum"un maliyyə resursları hesabına görüləcək. Avadanlığın çatdırılması və quraşdırılması isə "Siemens"ə aid olacaq. İşlərin sifarişini ARDNŞ-in "Azneft" İstehsalat Birliyi həyata keçirəcək.
Avadanlıq istər yeni, istər də mövcud platformalarda quraşdırılacaq.