Azərbaycan, Bakı, 05 iyun/ Trend , müxbir S.Babayeva/ Mayın 1-nə olan məlumatlara əsasən, Azərbaycanda mobil rabitə abunəçilərinin sayı 4,6 mln. nəfər təşkil edib. Bu barədə Azərbaycanın Rabitə və İnformasiya Texnologiyaları Nazirliyinin tənzimləmə şöbəsinin rəhbəri Əliyar Təmirov mayın sonunda İstanbulda keçirilmiş Qara dəniz və Xəzər regionları ölkələrinin üçüncü tənzimləyici konfransında məlumat verib.
Beləliklə, ölkədə hər 100 nəfərə 53 mobil telefon düşür.
Onun sözlərinə görə, GSM şəbəkəsi abunəçilərinin 3,5 mln. nəfəri - 70 faiz Azercell Telecom-un, 20 faiz (1 mln.) Bakcell-in və 10 faiz Azerfon-un payına düşür. Bundan əlavə, ölkədə 13 min abunəçiyə xidmət göstərən CDMA operatoru Catel fəaliyyət göstərir.
Hökumətin proqnozlarına görə, 2008-ci ildə mobil rabitə abunəçilərinin sayı 5,2 mln. nəfərə çatacaq. 2009-cu ildə bu rəqəm 5,9 mln., 2010-cu ildə 6,2 mln., və 2011-ci ildə 6,8 mln. nəfərədək arta bilər.
