Azərbaycan, Bakı, 24 iyul/ Trend , müxbir S.Babayeva/ Azərbaycanda kompyuter texnikası və avadanlığı istehsalçısı olan KUR Computers Moldovanın Clara SRL şirkəti ilə kompyuterlərin satışına dair müqavilə bağlayıb. Bu barədə cümə axşamı KUR Computers-in rəhbəri Rizvan Osmanov məlumat verib.
Onun sözlərinə görə, müqavilə Moldova tərəfinin təqribən minədək kompyuter almasını nəzərdə tutur. "Lakin birinci mərhələdə cəmi 22 kompyuter realizə ediləcək", - Osmanov söyləyib.
O qeyd edib ki, sonrakı illərdə müəssisənin planlarına öz məhsullarını Gürcüstan və regionun digər ölkələrində realizə etmək daxildir.
Müəssisənin gücü sutkada 140 kompyuter istehsal etməyə imkan verir.
2007-ci ildə KUR təqribən 12 min kompyuter, bir o qədər də telefon aparatı və 40 informasiya köşkü istehsal edib.
KUR zavodu birgə müəssisə kimi fəaliyyət göstərir. Onun səhmlərinin 51 faizi Rabitə və İnformasiya Texnologiyaları Nazirliyinə, 36 faizi yerli SİNAM şirkətinə və 13 faizi özəl şəxslərə məxsusdur.
