Azərbaycan, Bakı, 25 sentyabr/ Trend , müxbir S.Babayeva/ Azərbaycanın Rabitə və İnformasiya Texnologiyaları Nazirliyi Tarif Şurasına İnternet resurslarının qiymətlərinə yenidən baxmaq barədə təkliflər təqdim edib, - dövlət idarəsindən bildiriblər.
"Biz ölkədə İnternetin inkişafı üçün resursların tariflərinə yenidən baxmağı təklif etmişik", - nazirlikdən bildiriblər.
Dövlət qurumunda qeyd etdiklərinə görə, Rabitə Nazirliyi yanında İnternetin İnkişafı üzrə Koordinasiya Şurası ölkədə İnternetin kütləviləşdirilməsi və qiymətlərinin azaldılması məsələsini dəfələrlə müzakirə edib.
Şuranın funksiyalarına Azərbaycan ərazisində İnternetin inkişafı üzrə tədbirlər, domenlərin qeydiyyatı, onlardan istifadə, bu sahədə fəaliyyət göstərən müəssisələrə elmi - metodiki yardımın göstərilməsi daxildir.
Nazirliyin məlumatına əsasən, əvvəllər İnternet provayderləri üçün güzəştlərin tətbiqi barədə ATS-ə, sonra isə Tarif Şurasına tövsiyələr göndərilib.
"Biz ölkədə İnternetin inkişafı üçün əlimizdən gələni edirik. Lakin ölkədəki iqtisadi vəziyyət imkan vermədiyindən və texniki baxımdan mümkün olmadığından, qiymətlərin 100 faiz azaldılması mümkün deyil", - dövlət idarəsindən bildiriblər.
Nazirlikdə qeyd edirlər ki, ilin əvvəlindən İnternetə çıxış qiymətləri 35 - 40 faiz azaldılıb.
"Multimedia" informasiya sistem və texnologiyaları mərkəzinin direktoru, "Azərbaycanın İnternet-forumu" QHT- nin prezidenti Osman Gündüz hesab edir ki, bazarın liberallaşdırılması və ölkədə qiymətlərin azaldılması üçün bütün zəruri tədbirlər görülmür.
"Biz Rabitə Nazirliyinə İnternetin qiymətlərinin azaldılması üzrə tam bir təkliflər paketi təqdim etmişik. Lakin əbəs yerə", - o bildirib.
Təkliflərə subsidiyaların ayrılması, İnternet provayderlər üçün resurslara çəkilən xərclərin azaldılması daxildir.
"Qonşu ölkələrdə 2 Mqb/s İnternet kanalının qiyməti ayda cəmi $20-30 olduğu halda, bizdə niyə ayda $1,5 min olmalıdır?", - Gündüz bildirib.
Müəlliflə əlaqə saxlamaq üçün elektron ünvan: с[email protected]
