Аzərbaycan, Bakı, 30 avqust /Trend, müxbir H.Vəliyev/
Azərbaycan poçt rabitəsi operatoru İran ərazisi vasitəsilə Naxçıvan Muxtar Respublikasına yerüstü poçt göndərişlərini dayandırıb. Bu barədə Rabitə və İnformasiya Texnologiyaları Nazirliyinin poçt rabitəsi üzrə şöbə müdiri Novruz Məmmədov deyib.
Məmmədovun sözlərinə görə, Naxçıvan Muxtar Respublikasına poçt göndərişlərinin İran vasitəsilə çatdırılması ilə bağlı hazırkı proses həm zaman, həm də çatdırılma dəyəri baxımından qənaətbəxş deyil.
"Azərbaycan İran vasitəsilə Naxçıvana bir sıra poçt göndərişləri həyata keçirib, lakin poçt göndərişlərinin çatdırılması üzrə xidmət göstərilməsində İran tərəfdən müəyyən çətinliklər mövcuddur. Bu məsələnin müsbət həlli, poçt göndərişləri prosedurlarının sadə şəkildə tətbiqi üçün İran nümayəndələri ilə dəfələrlə görüşmüşük. Bununla belə, məsələ gündəmdə qalmaqda davam edir və həllini tapmamış bir sıra məsələlər var. Azərbaycan tərəfi yerüstü poçt göndərişlərini dayandırıb və bu gün NMR-ə poçt çatdırılması hava yolu ilə həyata keçirilir", - Novruzov deyib.
Nazirliyin poçt rabitəsi üzrə şöbə müdiri hesab edir ki, NMR-ə İran vasitəsilə poçt göndərişlərinin çatdırılması üzrə xidmətgöstərmə proseduru sadələşdirildikdən sonra, maliyyə cəhətdən təsdiq olunacaq.
Azərbaycanın İranla poçt rabitəsi sahəsində əməkdaşlıq məsələləri ötən ilin dekabrında - İran poçt rabitəsi operatoru nümayəndələrinin Azərbaycana səfəri zamanı müzakirə olunub.
Poçt rabitəsi sahəsində İranla əməkdaşlıq 10 mart 2009-cu il Azərbaycan və İranın rabitə və informasiya texnologiyaları nazirlikləri arasında memorandum imzalanması çərçivəsində həyata keçirilir.
İmzalanmış sənəd və memorandumda nəzərdə tutulmuş tədbirlərə müvafiq olaraq, ikitərəfli görüşlərin müntəzəm şəkildə keçirilməsi planlaşdırılır.