Azərbaycan, Bakı, 16 dekabr /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyi GUAM üzvü olan ölkələrlə "Şərq-Qərb" transmilli informasiya supermagistralının tikintisi layihəsini nəzərdən keçirəcək. Bu barədə Trend-ə cümə axşamı Rabitə və İnformasiya Texnologiyaları Nazirliyinin Elmi potensial və strateji planlaşdırma şöbəsinin müdiri İsfəndiyar Əliyev məlumat verib.
Məsələyə dekabrın 16-17-də Kiyevdə keçiriləcək GUAM-ın informasiya texnologiyaları sahəsində işçi qrupunun növbəti iclası çərçivəsində baxılacaq.
Əliyevin sözlərinə görə, Azərbaycan tərəfi iclas iştirakçılarını BMT Baş Assambleyasında qəbul edilən "Transavrasiya yüksəksürətli informasiya magistralı sayəsində İnternetdən geniş istifadə" qətnaməsi barədə məlumatlandıracaq. Həmin qətnamənin qəbul edilməsindən sonra bir çox ölkələr bu layihəyə böyük maraq göstəriblər və bununla əlaqədar maliyyə dəstəyi göstərməyə hazır olduqlarını ifadə ediblər.
Siyasi qətnaməyə əsasən, bütün regional ölkələrə bu layihənin reallaşması üçün zəruri tədbirlər görmək tövsiyə olunub. BMT tərəfindən qəbul edilən qətnamə ümumilikdə 20 ölkəni birləşdirmək və regionun inkişafında vacib rol oynamağı nəzərdə tutur. Layihənin reallaşdırılması Qərbi Avropa və Sakit okean hövzəsinə daxil olan ölkələr arasında "uçurumun" aradan qaldırılmasına imkan verir.
Azərbaycan tərəfinin sədrlik edəcəyi görüşdə GUAM-a üzv olan ölkələrin profilli nazirlik və idarələrinin nümayəndələri iştirak edəcəklər.
"Bu gün "Şərq-Qərb" layihəsi çərçivəsində əməkdaşlığın imkanları artıq bu məsələ ilə bağlı müəyyən razılaşmanın olduğu gürcü tərəfilə müzakirə edilib. Ümumilikdə, Kiyev iclası gələcəkdə əməkdaşlığın mümkün olacağı sahələrin müəyyən edilməsi məqsədi daşıyır. Biz informasiya cəmiyyətinin inkişafı sahəsində əməkdaşlığın perspektivləri üzrə konsensusa gəlmək fikrindəyik. Bu, İKT, İnternet, "Elektron hökumət" və s. infrastruktur layihələri üzrə əməkdaşlıqdır. İclasın yekunu üzrə protokol tərtib ediləcək", - Əliyev bildirib.