Azərbaycan, Bakı, 31 mart /Trend, müxbir H.Vəliyev /
Azərbaycanın poçt rabitəsi operatoru "Azərpoçt" MMC maliyyə xidmətlərinin inkişafı layihəsi çərçivəsində bütün kompyuter parkının proqram təminatını "Microsoft Enterprise Agreement" korporativ lisenziyalaşdırma proqramına uyğun yeniləyir. Bu barədə cümə axşamı Trend-ə Azərbaycanın Rabitə və İnformasiya Texnologiyaları Nazirliyindən məlumat verilib.
"Microsoft"un proqram məhsullarının lisenziyalı versiyası işçi stansiyalarında quraşdırılır və kompyuter parkının böyüyəcəyi halda "Microsoft"un yeni relizləri mərhələli şəkildə tətbiq ediləcək.
İşlər Rabitə Nazirliyi ilə "Microsoft"un imzaladığı saziş çərçivəsində aparılır ki, onun əsasında nazirliyin bütün strukturlarının kompyuter parkı yenilənəcək.
Lisenziyalaşdırma proqramı işçi stansiya və serverlərin bütün parkı üçün proqram məhsullarının yenilənmiş versiyasından istifadə üzrə lisenziyanın alınmasını nəzərdə tutur. "Microsoft Enterprise Agreement" proqramı kompyuterlərinin sayı 250 ədəddən çox olan təşkilatlar üçün nəzərdə tutulub.
Lisenziyalaşdırma proqramı üç ilə qədər möhlət və birillik ödəmələrlə daimi istifadə lisenziyasının əldə edilməsini nəzərdə tutur.
Korporativ lisenziyalaşdırmanın üstünlüyü proqram məhsullarının yeni versiyasından, yenilik və patçlardan istifadə mümkünlüyüdür ki, bu da informasiya sisteminin təhlükəsizliyini və onun dünyadakı tendensiyalara uyğun daimi inkişafını təmin edir.