Azərbaycan, Bakı, 5 aprel /Trend, müxbir H.Vəliyev/
Azərbaycanın poçt rabitəsi operatoru "Azərpoçt" MMC ilin birinci yarısının sonunadək Azərbaycanın bütün ərazisində poçt göndərişlərinin hərəkətinin izlənilməsi sistemini tətbiq edəcək. Bu barədə Trend-ə Azərbaycanın Rabitə və İnformasiya Texnologiyaları Nazirliyinin Poçt rabitəsi şöbəsinin müdiri, RRB-nin Poçt rabitəsi komissiyasının sədri Novruz Məmmədov bildirib.
Məmmədovun sözlərinə görə, bu günədək sistemin işə salınması üçün bütün zəriri texniki avadanlıqlar regional poçt şöbələrinə çatdırılıb və onların quraşdırılması üzrə işlər görülür.
Poçt göndərişlərinin izlənilməsi sistemi poçt şöbələrində göndərənə veriləcək unikal poçt identifikatorunun mənimsənilməsini nəzərdə tutur. Bu, göndərişin hər bir mərhələsində vahid məlumat bazasına poçt identifikatorundakı məlumatı qeyd etməklə, internet vasitəsilə poçt bağlamasının son təyinat nöqtəsinədək çatmasını izləməyə imkan verir.
Sistem "Azərpoçt" poçt rabitəsi operatorunun rəsmi internet resursuna birləşdirilib.
Poçt göndərişlərinin izlənilməsi sistemi EMS (Express Mail Service) və digər poçt xidmətlərində də tətbiq ediləcək.
