Azərbaycan, Bakı, 3 may /Trend, müxbir H.Vəliyev/
"Bakı Telefon Rabitəsi" İstehsalat Birliyinin müətəxəssislərinin səyi ilə CATEL-in stasionar şəbəkəsində nasazlıq aradan qaldırılıb. Trend-in məlumatına görə, bu barədə çərşənbə axşamı rabitə və informasiya texnologiyaları nazirinin müavini İltimas Məmmədov deyib.
Məmmədovun sözlərinə görə, CDMA standartında işləyən mobil rabitə xidmətlərinə gəldikdə, problem bu həftə ərzində aradan qaldırılacaq.
CATEL-in məlumatına görə, hazırda şirkətin mütəxəssisləri nasazlıqların aradan qaldırılması ilə məşğuldur.
Aparatda yaranan qüsurların nasazlıqlara səbəb olması abonentləri zəng etmək və zəngləri qəbul etmək hüququndan məhrum edib.
CATEL şəbəkəsində problemlər aprelin 1-dən başlayıb. Nəticədə bu, CDMA standartında işləyən telefon sahiblərinin (417, 418 və 415 indeksli telefon nömrələri, eləcə də 040 zona kodu ilə başlayan Fonex mobil şəbəkə nömrələri) telefon şəbəkəsindən ayrılmasına gətirib çıxarıb. Şirkət bunu cihazlardakı nasazlıqlarla izah edib.
Bu gün CATEL operatoru şəbəkəsinin abonentlərinin ümumi sayı 70 minə yaxındır. Bunun təxminən 60 mini CDMA simsiz rabitə standartının abonentləridir.
