Azərbaycan, Bakı, 12 dekabr /Trend, müxbir H.Vəliyev/
Azərbaycanın yanacaqdoldurma məntəqələrində (YDM) yeni nəzarət-kassa aparatlarının tətbiqinə başlanılıb. Bu barədə bazar ertəsi Trend-ə "SayberNet" şirkətindən məlumat veriblər.
Sistem inteqratoru funksiyasını həyata keçirən Azərbaycanın İT şirkəti "SayberNet" struktur qismində seçilib və ona sistemin texniki qurulması üzrə işlər tapşırılıb.
Layihə "Caspel" şirkəti ilə birgə həyata keçirilir. Şirkət kassa aparatlarının (IBM SurePOS 100) təchizatçısıdır.
Yeni nəzarət-kassa aparatlarında "SayberNet YDM POS v2.0" proqram təminatı quraşdırılıb ki, bu da "SayberNet" şirkətinin istehsalıdır.
Yeni nəzarət-kassa aparatlarının tətbiqi Azərbaycan Nazirlər Kabinetinin "Azərbaycanda yanacaqdoldurma məntəqələrində nəzarət-kassa aparatlarının tətbiqi haqqında" qərarına uyğun başlanılıb.
Sənədə əsasən, 2012-ci il yanvar ayının 1-nə qədər hazırda Azərbaycan ərazisindəki yanacaqdoldurma məntəqələrində istifadədə olan nəzarət-kassa aparatlarının onların istehlakçıları tərəfindən Dövlət reyestrinə daxil edilmiş, xüsusi konstruksiyalı və texniki göstəricilərə malik, o cümlədən çek verilmədən neft məhsullarının və maye qazın alıcıya satılmasını (buraxılmasını) istisna (blokirovka) edən yeni nəzarət-kassa aparatları ilə əvəz olunması və onların qeydiyyata alınması ilə bağlı bir sıra işlərin həyata keçirilməsi nəzərdə tutulur.
