Azərbaycan, Bakı, 29 mart /Trend, müxbir H.Vəliyev/
2014-cü ilin yanvar-mart aylarında Azərbaycanda "Facebook" istifadəçilərinin sayı 5 faiz artıb. Trend-in "Global Stats" statistika mərkəzinə istinadən verdiyi məlumata görə, ötən ilin eyni dövrü ilə müqayisədə "Facebook" istifadəçilərinin sayı 6,10 faiz artıb.
"Facebook" Azərbaycanda ən populyar sosial şəbəkədir. Onun sosial media bazarında payı 68,32 faizdir.
2014-cü ilin I rübünün yekunları üzrə "Twitter" sosial şəbəkəsinin istifadəçilərinin sayında azalma qeydə alınıb. Bu dövrdə Twitter-in payı 20,33 faiz azalaraq 9,25 faiz təşkil edib. Bu da 2013-cü ilin analoji dövr göstəricisindən 20 faiz azdır.
Yanvar-martda "YouTube" istifadəçilərinin sayı 12,46 faiz artıb. YouTube-un Azərbaycanda bazar payı 7,4 faiz təşkil edir. Ötən ilin eyni dövrü ilə müqayisədə YouTube-un auditoriyası 55,45 faiz azalıb.
"Odnoklassniki" sosial şəbəkəsinin istifadəçilərinin sayı da 13,4 faiz azalıb. Bu sosial şəbəkənin bazar payı 4,92 faizdir.
3,84 faiz paya sahib "Tumbir" siyahının beşincisidir. Sonrakı yerləri "Pinterest" (2,41 faiz) və "Vkontakte" (1,87 faiz) tuturlar.
