Azərbaycan, Bakı, 23 sentyabr /Trend, müxbir Hüseyn Vəliyev/
"B&BTV Communications" kabel televizisiyası operatoru və "Azerfon" MMC mobil rabitə operatoru Bakıda "Triple Play" prinsipi ilə işləyən rəqəmsal televiziya xidmətini işə salmağa hazırlaşırlar. Bunu Trendə ölkənin telekommunikasiya bazarındakı mənbə deyib.
"Triple Play" istifadəçinin eyni anda 3 xidmət əldə etdiyi kompleks xidmətdir. Genişzolaqlı çıxış kanalına qoşulmuş abonent 3 servisdən istifadə edə bilər: internet şəbəkəsinə, rəqəmsal televiziyaya və telefoniyaya yüksəksürətli giriş.
Mənbə qeyd edib ki, layihə son istifadəçiyə kommersiya xidmətlərinin göstərilməsi üçün iki şirkətin məhsullarının bir araya gətirilməsini nəzərdə tutur: "Söhbət bir neçə xidməti birləşdirməyə imkan verən kompleks həlldən gedir. Bununla yanaşı, arzu edən hər bir şəxs ona lazım olan həlldən yararlana bilər".
Servis "Evə optika" prinsipi üzrə genişzolaqlı xidmətlərin göstərilməsini nəzərdə tutan "NarHome" brendi ilə təklif olunacaq.
Kabel televiziyasının (DVB-T standartlı) xidməti "NarTV" ticarət markası ilə tanınacaq. İlkin mərhələdə "NarHome" layihəsi Bakıda start götürəcək, sonra isə getdikcə Azərbaycanın bütün rayonları üzrə genişləndiriləcək.
