Azərbaycanın rabitə və informasiya texnologiyaları naziri Əli Abbasovun rəhbərlik etdiyi nümayəndə heyəti işgüzar səfərlə Türkiyəyə yola düşüb. Bu barədə Trend ə nazirlikdən məlumat verilib.
Səfərdə əsas məqsəd Beynəlxalq Elektron Rabitə İttifaqının (International Telecommunication Union) noyabrın 6-dan 24-dək Antalyada keçiriləcək səlahiyyətli konfransında iştirak etməkdən ibarətdir.
Səlahiyyətli konfrans Beynəlxalq Elektron Rabitə İttifaqının siyasətin hazırlanmasına görə məsul olan ali orqanıdır. 4 ildə bir dəfə çağırılan konfransda təşkilatın ali rəhbəri, Şura və radioreqlament komissiyası üzvləri seçilir, ümumi siyasət müəyyən edilir, 4 illik strateji və maliyyə planları qəbul olunur. Başqa sözlə, bu mühüm tədbirdə Beynəlxalq Elektron Rabitə İttifaqına üzv dövlətlər (191) gələcəkdə təşkilatın roluna dair qərarlar qəbul edir, onun bütün dünyada informasiya və kommunikasiya texnologiyalarının inkişafına təsir göstərmək gücünü müəyyən edir.
Sektor üzvləri də (nüfuzlu istismar, elmi və sənaye təşkilatları, o cümlədən maliyyə müəssisələri və ya inkişaf məsələləri üzrə və onların beynəlxalq xarakterli təşkilatlarını təmsil edən müəssisələr) konfransın işində müşahidəçi qismində iştirak edir.
Səfər zamanı Azərbaycan tərəfinin Beynəlxalq Elektron Rabitə İttifaqına üzv ölkələrin özəl sektor, dövlət müəssisələri nümayəndələri ilə ikitərəfli görüşləri gözlənilir.