Azərbaycan, Bakı/ Trend müxbir S.Babayeva/ İlin sonuna qədər Azərbaycanda ilk dəfə olaraq elektron ticarətin inkişafı üçün tövsiyələr hazırlanacaq.
Bazar ertəsi Rabitə və İnformasiya Texnologiyaları Nazirliyindən verilən məlumata görə, layihənin birinci mərhələsi ölkədə elektron ticarətin ümumi vəziyyətinin araşdırılmasını əhatə edir. Daha sonra isə Azərbaycanda bu biznesdə maraqlı olan şirkətlər üçün təklif və tövsiyələr hazırlanacaq. Şirkətlər bu tövsiyələri pulsuz olaraq ala biləcəklər.
Ölkənin müxtəlif ali məktəblərinin alimlərinin daxil olduğu işçi qrup tərəfindən həmin sənəd hazırlanacaq. Layihənin məsləhətçisi "Silverkey" şirkətidir. Layihənin bütün maliyyə xərclərini Rabitə Nazirliyi öz üzərinə götürüb.
Rabitə Nazirliyindən bildiriblər ki, əhali elektron ticarətin tətbiq olunmasında çox maraqlıdır.
"Elektron ticarət" özündə İnternet və özəl rabitə şəbəkələri vasitəsilə aparılan maliyyə əməliyyatları və sövdələşmələrini əhatə edir ki, bura da məhsulların alqı-satqısı, xidmətlər, həmçinin maliyyə vəsaitlərinin köçürülməsi daxildir.