Azərbaycan, Bakı, 24 dekabr / Trend müxbir A.Tağıyeva /
İraq xalq üsyanlarının nəticəsi olan ərəb inqilablarını dəstəkləyir. Bu barədə şənbə günü İraqın xarici işlər naziri Huşyar Zibari Trend-ə eksklüziv müsahibəsində bildirib.
Nazirin sözlərinə görə, İraq bu inqilablardan qorxmur, çünki ölkə artıq bu dövrdən keçib.
"Diktatura rejiminin süqutundan sonra İraq xalqın bütün tələblərini həyata keçirib və ona bütün hüquqları verib", - Zibari deyib.
2011-ci ilin əvvəlindən Yaxın Şərqin və Şimali Afrikanın bir çox ölkələrini, o cümlədən Tunis, Misir, Liviya, Yəmən və Suriyanı bu ölkələrdəki rejimlərin fəaliyyətlərinə qarşı kütləvi iğtişaşlara və etiraz aksiyalarına çevrilən xalq narazılığı dalğası bürüyüb. Xalq üsyanı artıq Misirdə, Tunisdə və Liviyada hakim rejimlərin devrilməsinə gətirib çıxarıb. Hazırda əhali ilə hakimiyyət arasında qanlı amansız mübarizə Suriyada davam edir.
Nazir Suriyadakı vəziyyətlə bağlı bəyan edib ki, İraq siyasi böhranın nizamlanmasına kömək etməyə cəh edir, çünki bu ölkə İraqla qonşudur və Bağdad Dəməşqlə siyasi, iqtisadi, ticarət və ictimai sahələrdə çox sıx münasibətlərə malikdir.
Onun sözlərinə görə, lakin bu, İraqın rejimi dəstəkləməsi və xalqa qarşı olması demək deyil.
"Biz Suriya xalqının azadlığını dəstəkləyirik və onun diktatura rejimindən azad olmasını arzulayırıq. Bununla yanaşı, hər bir ölkə özünün siyasi planlarına malikdir", - o deyib.
Nazir hesab edir ki, Suriyada baş verən hadisələr bütün regiona, o cümlədən də İraqa təsir edir.
Suriyada 9 aydır ki, hökumət əleyhinə aksiyalar davam edir. Aksiyalar ilk dəfə mart ayının ortalarında ölkənin cənubundakı Dəra şəhərində başlayıb, sonra regionun digər şəhərlərinə keçib. Son zamanlar xüsusən Livan və Türkiyə ilə sərhəd rayonlarındakı qarşıdurmalar getdikcə zorakılıq, dinlərarası xarakter alır. Gündəlik olaraq, həm dinc sakinlər, həm də güc strukturlarının əməkdaşları tərəfindən ölənlərin olması barədə məlumatlar daxil olur.
BMT-nin məlumatına görə, həlak olanların sayı 5 min nəfəri ötüb. Suriya hakimiyyəti isə hər iki tərəfdən 1,5 mindən artıq insanın, o cümlədən 1,1 min nəfərdən çox güc strukturları əməkdaşlarının həlak olduğunu bəyan edir.
