Azərbaycan, Bakı, 5 aprel /Trend/
Martın 30-da Azərbaycanın Qəbələ rayonunda dağlıq ərazidə itkin düşmüş rayonun Vəndam qəsəbəsinin 3 nəfər sakininin axtarışları davam etdirilir.
Trend Fövqəladə Hallar Nazirliyinin rəsmi saytına istinadən məlumat verir ki, FHN-in Aviasiya dəstəsinin 1 ədəd helikopteri, Xüsusi Riskli Xilasetmə Xidmətinin xilasediciləri və xüsusi təlim keçmiş itlərin cəlb olunduğu axtarışlar nəticə verməyib.
İtkin düşmüş şəxslərin axtarışları sabah da davam etdiriləcək.
Qəbələ rayon polis şöbəsindən Trend-ə verilən məlumata görə, Vəndam kənd sakinləri 1992-ci il təvəllüdlü Elvin Kərimov, 1990-cı il təvəllüdlü Nazir Bayramov və 1991-ci il təvəllüdlü Zakir Məmmədov ov etmək məqsədilə dağa gedib və geri qayıtmayıb.
Yaxınları onların qar uçqununa düşdüyünü bildiriblər.
Faktla bağlı rayon polis şöbəsində araşdırmalara başlanılıb.