Azərbaycan, Bakı, 19 fevral / Trend , müx. C.Babayeva/ Müxalifət partiyalarının Demokratik Seçki Mərkəzi (DSM) prezidentliyə namizədlərin birliyinə çevrilməyəcək. Bu barədə çərşənbə axşamı Trend ə Mərkəzdə təmsil olunan Azadlıq partiyasının sədri Əhməd Oruc bildirib.
Keçən ilin dekabrında Azərbaycanın 18 müxalifət partiyası əməkdaşlıq barədə saziş imzalayıb. Sazişi "Bizim Azərbaycan" blokuna daxil olan səkkiz partiya, Klassik Xalq Cəbhəsi Partiyası (KXCP), Sosial-Demokrat, Vətəndaş Həmrəyliyi, Böyük Quruluş, Azadlıq, Milli-Demokrat, Ədalət, Ümid partiyaları və Azərbaycan Yolu Siyasi Hərəkatı imzalayıb. Yanvarın 30-da saziş imzalayan partiyaların doqquzu - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbacyan, Açıq Cəmiyyət, Təkamül və Yaşıllar Partiyası "Demokratik Seçki Mərkəzinin" yaradılması barədə qərar qəbul edib.
Mərkəzdə təmsil olunan Böyük Quruluş və Yaşıllar partiyaları prezident seçkisində öz namizədləri ilə iştirak edəcəkləri barədə artıq qərar qəbul edib.
Orucun sözlərinə görə, DSM-də təmsil olunan partiyalar qarşısında heç bir öhdəlik qoyulmayıb.
"Mərkəzdə təmsil olunan partiyalar bir sıra məsələlərlə bağlı ümumi razılığa gəlib. Razılaşdırılan məsələlər Seçki Məcəlləsinə dəyişiklər və ölkədə seçki öncəsi şəraitin dəyişdirilməsi ilə bağlı ortaq mövqedən çıxış etməklə əlaqədardır. Digər məsələlərlə bağlı qərar qəbul etməkdə partiyalar sərbəstdir" - deyə o bildirib.
Onun sözlərinə görə, DSM-də təmsil olunan bəzi partiyaların indidən prezident seçkisinə öz namizədləri ilə qatılması barədə qərar qəbul etmələri mərkəzdə heç bir narazılığa səbəb ola bilməz.