Azərbaycan, Bakı, 13 mart / Trend , müxbir S.İlhamqızı/ Qeyri Hökumət Təşkilatlarına Dövlət Dəstəyi Şurasına üzvlüyə daha üç nəfər namizəd seçilib. Trend in məlumatına görə, bunlar - Beynəlxalq Əlillər İttifaqının sədri Davud Rəhimov, Gözdən Əlillər Cəmiyyətinin sədri Səmiyar Abdullayev, Qaçqın və Köçkün Gənclər Təşkilatının sədri Vüqar Qədirovdur.
Azərbaycan prezidenti İlham Əliyevin 13 dekabr 2007-ci il tarixli fərmanına əsasən, "Azərbaycan Prezidenti yanında QHT-lərə Dövlət Dəstəyi Şurası" yaradılır. Şura 11 nəfər üzvdən ibarət fəaliyyət göstərəcək. 8 üzv QHT-lərin təklif etdiyi nümayəndələrdən, 3-ü dövlət orqanlarının nümayəndələrindən ibarət olmaqla, 4 illiyə təyin edilirlər. Seçilmiş namizədlər arasından Şuraya üzvləri prezident təyin edəcək.
Şuraya dünən və öncəki gün insan hüquqları və demokratiya, ailə, qadın, uşaq sahələri üzrə fəaliyyət göstərən QHT-lərdən altı nəfər namizəd seçilib.
Bu gün isə qaçqın-köçkün, əlil və veteranların məsələləri üzrə fəaliyyət göstərən QHT-lər arasından 3 nəfər namizəd seçilib.
Davud Rəhimov 19 səs, Səmiyar Abudullayev 17 səs, Vüqar Qədirov 16 səs toplayıblar. Dövlət başçısı onlardan birini Şurya üzv təyin edəcək.