Azərbaycan, Bakı, 05 iyun/ Trend , müxbir E.Babayev/ Hakim Yeni Azərbaycan Partiyası (YAP) Seçki Məcəlləsinə son əlavə və dəyişikliklərdən sonra seçki ilə bağlı planlarını dəyişib. "Milli Məclisdə seçki kampaniyasının müddətinin 120 gündən 75 günə endirilməsi barədə qərar qəbul edildikdən sonra YAP-ın seçki proqramında və qurultayının vaxtında dəyişiklik olunub", cümə axşamı Trend -a YAP icra katibinin müavini, millət vəkili Mübariz Qurbanlı bildirib.
Trend -un arayışı: Parlament bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın isə 40 minə endirilməsi nəzərdə tutulur. Bundan əlavə, seçki təbliğatının müddəti 120 gündən 75 günə endirilir. Məcəllədə dövlət KİV-də namizədlərə pulsuz efir vaxtı ayrılması qadağan edilib. YAP təmsilçiləri seçki kampaniyasının müddəti azalmamışdan öncə qurultayın iyun ayının sonları və ya iyul ayının əvvəllərində keçiriləcəyini bildirirdilər.
Qurbanlı bildirib ki, qanunvericiliyə uyğun olaraq, partiyanın namizədi seçki kampaniyasına rəsmən start verildikdən sonra irəli sürülür. "Ona görə də hakim partiya qanuna uyğun olaraq, öz namizədini seçki kampaniyasına rəsmən start verildikdən sonra irəli sürəcək. Bunun üçün partiyanın qurultayı keçiriləcək və prezident İlham Əliyevin namizədliyi irəli sürüləcək" - deyən YAP rəsmisi ali toplantıda təşkilatda müəyyən kadr dəyişikliklərinin olacağını da istisna etməyib.
Trend -un arayışı: Azərbaycanda prezident seçkisi oktyabrın 15-də keçiriləcəyindən seçkiyə rəsmi start iyulun sonu avqustun əvvəli veriləcək.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildən artıqdır hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
