Azərbaycan, Bakı, 06 iyun/ Trend , müxbir İ.Əlizadə/ Azərbaycan parlamentinin sədri Oqtay Əsədov Yunanıstan prezidenti Koralos Papuliosla görüşəcək. "Görüşdə Azərbaycanla Yunanıstan arasında siyasi, iqtisadi əlaqələrin genişləndirilməsi məsələləri müzakirə olunacaq", - deyə cümə günü Trend -a açıqlamasında Azərbaycan parlamentinin mətbuat katibi Akif Nəsirov bildirib.
Onun sözlərinə görə, Əsədov Yunanıstan parlamentinin sədri Donitios Syufosla da görüşəcək.
Mətbuat kabiti qeyd edib ki, iyunun onunda Yunanıstan paytaxtı Afinada Qara Dəniz İqtisadi Əməkdaşlıq Təşkilatına üzv olan ölkələrin parlament sədrlərinin sammiti və təşkilatın Baş Assambleyasının 31-ci sessiyası keçiriləcək. Azərbaycan parlamentinin sədri sammitdə və Baş Assambleyanın iclasında iştirak edəcək.
"Parlament sədrlərinin sammitində və Baş Assambleyada Qara dəniz regionu ölkələrində siyasi sabitliyin qorunması, terrorçuluqla mübarizədə parlamentlərin rolu, sərmayələrin Qara dəniz regionunun inkişafında rolu və digər məsələlər müzakirə olunacaq", -deyə parlament rəsmisi əlavə edib.
Azərbaycan parlamentinin sədri Afinada Ukrayna Ali Radasının rəhbəri Arseni Yatsenyuk və Moldova parlamentinin sədri Mariann Lpu ilə görüşəcək.
Əsədovun rəhbərlik etdiyi nümayəndə heyətinə deputatlar Asəf Hacıyev, Musa Quliyev, Vidadi Məmmədov, Jalə Əliyeva, Mübariz Qurbanlı və parlament Aparatının rəhbəri Səfa Mirzəyev daxildir.
Məqalə müəllifi ilə əlaqə ünvanı: [email protected]