Azərbaycan, Bakı, 10 iyun / Trend , müxbir C.Babayeva/ Azərbaycan müxalifətini təmsil edən Müsavat Partiyasında seçkiyə münasibətdə ciddi fikir ayrılıqları yaranıb. "Seçki Məcəlləsinə olunan əlavə və dəyişikliklər seçkiyə qatılmamaq fikrini qüvvətləndirməyə xidmət edir. İndiki şəraitdə prezident seçkisində iştirakın heç bir əhəmiyyəti qalmayıb" - çərşənbə axşamı Trend -a partiyanın Divan üzvü Vurğun Əyyub bildirib.
Trend -un arayışı: Parlament keçən həftənin bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın 40 minə endirilməsi nəzərdə tutulur. Seçki təbliğatının müddəti 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Təbliğat materiallarının divarlara və obyektlərə vurulması qadağan edilib, bunun üçün xüsusi yerlər ayrılması nəzərdə tutulub. Müxalifət əlavə və dəyişikliklərdən narazı qalıb.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Əyyubun bildirdiyinə görə, Müsavat Partiyası Məclisinin prezident seçkisində iştirak etməklə bağlı qərarı hələ qüvvədədir. "Lakin bununla bərabər, boykot məsələsi də gündəlikdən çıxarılmayıb. Dünən partiyanın Divanında Seçki Məcəlləsindən sonra yaranmış vəziyyət ətraflı müzakirə olunub. Qərara alınıb ki, müzakirə partiyanın aşağı strukturlarında, rayon təşkilatlarında da davam etdirilsin və sonra Məclisin geniş müzakirəsinə çıxarılsın", - deyə Divan üzvü bildirib.
Partiyanın Mərkəzi İcra Aparatının rəhbəri Arif Hacılı çərşənbə axşamı Trend -a deyib ki, seçkidə iştirakla bağlı fərqli fikirlər olsa da, Məclisin növbəti toplantısında son qərar veriləcək.
Trend -un arayışı: Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]