Azərbaycan, Bakı, 24 iyun/ Trend , müxbir E.Babayev/ Azərbaycanın müxalif Böyük Quruluş Partiyası (BQP) prezident seçkisində hansı şərtlər daxilində iştirak edəcəyini açıqlayıb. "Yaxın vaxtlarda bizim partiyanın qərargah problemi həll olunmasa, seçkiyə getməyin heç bir mənası qalmır"- bunu çərşənbə axşamı Trend -a BQP sədri, millət vəkili Fazil Qəzənfəroğlu bildirib.
Trend -un arayışı: BQP bir neçə dəfə Dövlət Əmlakının İdarə Edilməsi üzrə Dövlət Komitəsinə qərargahla bağlı müraciət edib. Partiyanın ilk müraciətinə cavab olaraq BQP-yə qərargah təklif edilib. Lakin BQP həmin yerin əlverişsiz olduğunu əsas gətirərək, həmin qərargahdan imtina edib. Partiyanın qərargahla bağlı digər müraciətlərinə isə, hələ cavab verilməyib.
Qəzənfəroğlu bildirib ki, Dövlət Komitəsi ilə danışıqlar davam edir və müsbət nəticənin olacağına inam var. "Hər halda, biz belə bir addım atılacağına inanırıq. Qərargah problemimiz həll olunmasa, seçkiyə getməyəcəyik. Görünür ,bəzi məmurlar da bizi bu yola çəkməkdə maraqlıdırlar" - deyə Qəzənfəroğlu bildirib. Onun sözlərinə görə, partiyada seçki ilə bağlı müzakirələr davam edir. Bu qərarın hansı formada olması isə, birbaşa qərargah məsələsindən asılıdır.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]