Azərbaycan, Bakı, 25 avqust / Trend / T.Cəfərov / İranın Ali dini rəhbəri Ayətullah Əli Xameneinin son çıxışında prezident Mahmud Əhmədinejadı tamamilə dəstəkləməsini bildirməsi, növbəti prezident seçkilərində hakim partiyanın rəqiblərinin mövqeyini zəiflədir. "Bu bəyanat, əslində, Əhmədinejadın növbəti prezident seçkilərində rəqibi Haşimi Rəfsəncaninin mövqeini zəifləndirmək üçündür" - deyə, Almaniyada fəaliyyət göstərən beynəlxalq məsələlər üzrə ekspert Mehran Bərati Trend -a bildirib.
İranın Ali Dini rəhbəri Ayətullah Əli Xamenei İran prezidenti Mahmud Əhmədinejad və Nazirlər Kabinetinin üzvləri ilə görüşündə, hazırki hökümətin fəaliyyətindən razılığını bildirib. "Mən Əhmədinejadın siyasətlərini tamamilə dəstəkləyirəm" - deyən Xamenei, bəzi problemlərin olduğunu da bildirib. O, hakimiyyəti tənqid edənləri "təxribatçı" adlandırıb.
Xameneinin Əhmədinejadı dəstəkləməsi, bəzi qüvvələrin ölkə daxilində Əhmədinejadın daxili və xarici siyasətini kəskin tənqid etməsi ilə üst -üstə düşür.
Bəratinin sözlərinə görə, hazırda ənənəçi mühafizəkarlar və islahatçı qüvvələrin bir qismi arasında gələcək prezident seçkilərinə namizədlə bağlı həmrəylik var. "Xamenei növbəti pirezident seçkilərinə Əhmədinejadı yaxud hakim partiyadan olan başqa bir şəxsin namizədliyinin irəli sürülməsini istəyir" - deyə Bərati bazar ertəsi telefonla Berlindən Trend - a bildirib.
Digər İran eksperti Əhməd Zeydabadi isə, bu haqda Trend -a açıqlamasında bildirib ki, Ayətullah Xameneinin Əhmədinejadı dəstəkləməsinin əsas səbəbi onun hakimiyyətinin süqutundan narahatlığı ilə bağlıdır.
Bərati bildirib ki, hazırda Əhmədinejadın hakimiyyətdən uzaqlaşdırılması, yaxud süqutunun ehtimalı yoxdur. "Əhmədinejada qarşı olan qüvvələr arasında birlik yoxdur. İranın daxilindəki cinahlar zamanın tələbi ilə fikirlərini dəyişirlər. Ona görə də Əhmədinejada qarşı tənqidlər onu hakimiyyətdən kənarlaşdırmaq üçün deyil" - deyə Bərati bildirib.
Bərati əlavə edib ki, İranın Ali dini rəhbəri və Məsləhət Şurasının sədri (Rəfsəncani) arasında olan çəkişmə prezident seçkilərinədək davam edəcək və bu bu fikir ayrılığının müəyyən hissəsi Əhmədinejadın xarici siyasəti ilə bağlıdır.
Rəsmi Tehran hazırda çoxlu problemlərlə üzləşib. Rəfsəncani Əhmədinejadın təkcə daxili siyasətini deyil, həm də xarici siyasətini tənqid edir.
Zeydabadi bazar ertəsi telefonla İrandan bildirib ki, Xamenei Əhmədinejaddan razı olmasa da, Əhmədinejad daxili və xarici siyasətini İranın Ali dini rəhbəri ilə məsləhətləşir və buna görə də Xameneinin ondan narazılığına heç bir səbəb yoxdur.
Müəlliflə əlaqə saxlamaq üçün elektron ünvan [email protected]
