Azərbaycan Respublikasının Prezidenti
İlham Əliyev oktyabrın 24-də Türkiyə
Respublikası Baş nazirinin müavini Cəmil
Çiçəyi qəbul etmişdir.
Cəmil Çiçək Prezident seçilməsi
münasibətilə dövlətimizin
başçısına Türkiyə Prezidenti Abdullah
Gülün, Baş nazir Rəcəb Tayyib
Ərdoğanın, Türkiyə Böyük Millət
Məclisinin sədri Köksal Toptanın və ümumən
türk xalqının təbriklərini çatdırdı.
O, belə bir fərəhli gündə - andiçmə
mərasimində ölkəsinin təmsilçisi kimi
iştirak etməkdən məmnunluğunu söylədi.
Baş nazirin müavini Türkiyənin BMT
Təhlükəsizlik Şurasına qeyri-daimi üzv
seçilməsinə Azərbaycanın dəstək
verdiyinə görə Prezident İlham Əliyevə
minnətdarlıq etdi. Cəmil Çiçək
Türkiyə Prezidenti Abdullah Gülün, Baş nazir
Rəcəb Tayyib Ərdoğanın, TBMM-in sədri Köksal
Toptanın təbrik məktublarını dövlətimizin
başçısına təqdim etdi.
Prezident İlham Əliyev Türkiyə Prezidenti Abdullah
Gülün, Baş nazir Rəcəb Tayyib
Ərdoğanın, Türkiyə Böyük Millət
Məclisinin sədri Köksal Toptanın təbriklərinə
görə minnətdarlığını bildirdi,
özünün də ən xoş arzularını onlara
və dost, qardaş türk xalqına
çatdırmağı xahiş etdi.
Dövlətimizin başçısı Türkiyənin BMT
Təhlükəsizlik Şurasına qeyri-daimi üzv
seçilməsini əlamətdar hadisə kimi
qiymətləndirdi.
...