Azərbaycan, Bakı, 11 noyabr / Trend , müxbir C.Babayeva/ Azərbaycanda təsis olunacaq yeni Solçu Demokrat Partiyası solçu qüvvələrin birliyinin yaradılmasını dəstəkləyir.
"Azərbaycanda yaranmış siyasi mühitdə yeni partiyaların, birliklərin meydana çıxmasına ehtiyac var. Solçu qüvvələrin yeni birliyinin yaranmasında digər siyasi qüvvələr də maraqlı olacaq", - deyə Solçu Demokrat Partiyasının Təşkilat Komitəsinin sədri Elşən Manafov çərşənbə axşamı Trend -a bildirib.
Trend -un arayışı: Azərbaycan Sosialist, Kommunist, Vahid Kommunist partiyaları və Marksizm-Leninizm platformasında Azərbaycan Kommunist Partiyasının sədrləri solçu qüvvələrin birliyinin yaradılması ilə bağlı noyabrın əvvələrindən danışıqlar aparırlar. Birliyin yaradılmasında məqsəd bələdiyyə və parlament seçkilərində vahid platformadan çıxış etməkdir.
Azərbaycanda bələdiyyə seçkisi gələn il, parlament seçkisi isə 2010-cu ildə keçiriləcək.
Manafov yeni birlikdə siyasi proseslərə təsir imkanlarına, cəmiyyətdə nüfuza malik olan siyasi qüvvələrin təmsil olunmasını vacib hesab edir.
"Yeni siyasi birliyin yaradılması istiqamətində partiya liderləri öz ambisiyalarından imtina etməli və ümummilli maraqlar naminə əməkdaşlığı genişləndirməlidirlər. Bu, günün əsas tələblərindən biridir", - deyə o bildirib.
O, yaradacağı partiyanın solçu qüvvələrin birliyinə qoşulmasına münasibət bildirərkən hazırda partiyanın təsis olunması üçün hazırlıq işlərinin aparıldığını bildirib. "Bələdiyyə seçkilərinə qədər partiyanın formalaşdırılıb qeydiyyatdan keçirilməsi nəzərdə tutulub. Seçkidə partiyanın iştirakı məsələsi vacib məsələyə çevriləcək. Buna nail olmasaq, parlament seçkisinə qədər partiya quruculuğunda olan problemlərin həllinə nail olmağa çalışacağıq", - deyə Manafov bildirib.
Manafov Bakının bir sıra rayonlarında, Cəlilabad, Ucar və Ağdam rayonlarında rayon təşkilatlarının yaradıldığını bildirib. "Partiyanın 672 nəfər üzvü var. Üzvlərin əksəriyyəti müstəqil şəxslərdir. Onların 25-30 nəfəri Azərbaycan Sosial Demokrat Partiyasının keçmiş üzvləridir", - deyə Manafov bildirib.
Trend -un arayışı: Manafov Azərbaycan Sosial Demokrat Partiyası sədrinin ideoloji məsələlər üzrə katibi və Mərkəzi Komitənin Büro üzvü olub. Bu ilin sentyabrında partiyanın həmsədri Araz Əlizadəni qurumu idarə edə bilməməkdə ittiham edən Manafov partiyadan xaric olunub. Bundan sonra o, öz tərəfdarları ilə yeni sol təmayüllü partiya yaratmaq barədə qərar qəbul edib.
Məqalə müəllifi ilə əlaqə saxlamaq üçün ünvan: [email protected]