Azərbaycan, Bakı, 14 noyabr/ Trend , müxbir A.Hüseynbala/ Azərbaycanın müxalifət partiyaları Dağlıq Qarabağ münaqişəsinin nizamlanması ilə bağlı vahid konsepsiyanın hazırlanmasını mümkün sayır.
"Qarabağ münaqişəsinin nizamlanması ilə bağlı müxalifət partiyalarının vahid konsepsiya hazırlamasında hər hansı fikir ayrılığının olduğunu düşünmürəm" cümə günü Trend -a Azərbaycan Milli İstiqlal Partiyasının lideri Etibar Məmmədov bildirib.
Trend -un arayışı: Azərbaycan müxalifəti bu günə qədər Dağlıq Qarabağ probleminin həlli ilə bağlı vahid konsepsiya hazırlanmasına nail olmayıb. Siyasi partiyaların ayrı-ayrılıqda problemin həllinə dair təkliflər paketi olsa da, bütövlükdə vahid sənəd hazırlanmayıb.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məmmədovun fikrincə, əslində indi həm iqtidar, həm də müxalifət problemin yalnız beynəlxalq prinsiplər əsasında Azərbaycanın ərazi bütövlüyü çərçivəsində həllinin tərəfdarıdır.
"Müxalifət vahid konsepsiya təşəbbüsü ilə çıxış edə bilər", - Məmmədov əlavə edib.
"Müxalifətin birlikdə vahid konsepsiya hazırlaması mümkündür", - cümə günü Trend -a
Müsavat Partiyası Məclisinin sədri Sülhəddin Əkbər bildirib.
1999-cu ilin oktyabr ayında Müsavat Partiyası Qarabağ münaqişəsinin Azərbaycanın ərazi bütövlüyü çərçivəsində həllini nəzərdə tutan "Uğur" təkliflər paketini hazırlayıb. Sənəddəki prinsiplər ictimaiyyətə də açıqlanıb.
Onun sözlərinə görə, Müsavat Partiyası Məclisinin noyabrın 8-də keçirilən iclasında isə konsepsiya dünyada və regionda gedən proseslər nəzərə alınmaqla yeni şəraitə uyğunlaşdırılaraq təsdiq olunub.
"Vahid konsepsiya ilə bağlı liderlər düşünüb, qərar qəbul edə bilərlər. Məncə, Qarabağ problemi ilə bağlı müxalifət partiyaları arasında fikir ayrılığı ola bilməz", - Əkbər əlavə edib.
"Düşünürəm ki, yeni konsepsiyanın yaranmasına ehtiyac yaranarsa, "Qarabağ Xartiyası" sənədindəki müddəalardan istifadə oluna bilər", - cümə günü Trend -a "Azərbaycan Naminə" İctimai Forumun prezidenti Eldar Namazov bildirib.
Qarabağ probleminin həlli ilə bağlı vaxtilə müxalifət partiyalarının iştirakı ilə "Qarabağ Xartiyası" hazırlanıb. Bu sənəd Azərbaycan iqtidarına, ölkənin bütün siyasi və ictimai təşkilatlarına, eləcə də beynəlxalq ictimaiyyətə təqdim olunub. Xartiyanı 600-da artıq təşkilat imzalıyıb.
"Müxalifətin Qarabağ münaqişəsinin nizamlanması ilə bağlı təklifləri həm ictimaiyyətə, həm də ATƏT-in Minsk Qrupunun həmsədrlərinə çatdırılıb", - cümə günü Trend -a Milli Birlik Hərəkatının lideri Lalə Şövkət Hacıyeva deyib.
Onun fikrincə, problemin həllində başlıca prinsip Azərbaycanın ərazi bütövlüyünün toxunulmazlığının əsas götürülməsidir.
"Çox təəssüf ki, beynəlxalq hüquq normalarında iki məsələ - dövlətlərin ərazi bütövlüyü və millətlərin öz müqəddəratını təyinetmə hüququ bir-biri ilə ziddiyyət təşkil edir. 15 il əvvəl problemin həllini beynəlxalq müstəviyə çıxaranda düz etməmişik. Düşünürəm ki, münaqişəni ölkə daxilində həll etsəydik, daha düzgün olardı. Artıq gecdir, məsələ beynəlxalq ictimaiyyətin diqqət mərkəzindədir. Bu səbəbdən problemin həlli beynəlxalq hüquq normalarından asılıdır", - Şövkət əlavə edib.
Hərəkat lideri hesab edir ki, beynəlxalq normaları həyata keçirmək üçün Qarabağ münaqişəsi ilə bağlı Cənubi Qafqazda geosiyasi konsensusun olması vacibdir. "Konsensus olmayana qədər biz problemi həll edə bilməyəcəyik. Çünki Cənubi Qafqazda Rusiya ilə Qərbin maraqları toqquşur. Əgər həqiqətən Rusiya ilə Qərb konsensusa gəlsələr, onda Qarabağ prolemini Azərbaycanın ərazi bütövlüyü çərçivəsində həll etmək mümkün olacaq", - Şövkət bildirib.
Məqalə müəllifi ilə əlaqə ünvanı: [email protected]
