Azərbaycan, Bakı, 21 noyabr / Trend , müxbir C.Babayeva/ Azərbaycanın müxalif Müsavat Partiyasının gənclər təşkilatı noyabrın 27- də Gənclər və İdman Nazirliyinin qarşısında piket keçirmək niyyətindədir.
"Piketi Gənclər və İdman Nazirliyinin gənclər təşkilatlarına ayrı-seçkiliklə yanaşmasına etiraz olaraq keçirmək niyyətindəyik", - deyə cümə günü Trend -a Müsavat Partiyası gənclər təşkilatının sədri Tural Abbaslı məlumat verib.
Abbaslı Nazirlik tərəfindən son zamanlar təşkil olunan tədbirlərə müxalifyönlü gənclər təşkilatlarının dəvət olunmadıqlarını bildirib. "Təşkilatımızın təşkil etdiyi tədbirlərə Nazirliyin dəvət etdiyimiz nümayəndələri qatılmırlar. Digər gənclər təşkilatlarının tədbirlərində onlar həmişə iştiark edirlər", - deyə o bildirib.
O, piketin əsas şüarının "Gənclər arasında siyasi ayrı -seçkiliyə son qoyulsun!" olacağını bildirib. "Piketdə 50 nəfərin iştirakı nəzərdə tutulub. Aksiyanın keçirilməsi ilə bağlı müraciət Bakı Şəhər İcra Hakimiyytinə təqdim olunub. Piketə icazə verilməsə, Nazirlik qarşısında icazəsiz aksiya keçiriləcəyi istisna olunmur", - deyə Abbaslı bildirib.
Məqalə müəllifi ilə əlaqə saxlamaq üçün ünvan: [email protected]
