Azərbaycan, Bakı, 29 noyabr/ Trend , müxbir B.Həsənov, V.Javoronkova/ Ermənistan bəzi "güzəşt"lərə gedərsə, Türkiyə Qarabağ probleminin həllini gözləmədən Ermənistanla müəyyən səviyyədə əlaqələr qura bilər.
"Ermənistan "soyqırım" iddialarından geri addım atarsa, həmçinin yaxşı qonşuluq münasibətləri və Türkiyənin ərazi bütövlüyünü tanımaq haqqında bəyannamə imzalayarsa, Türkiyə Ermənistanla müəyyən səviyyədə əlaqələr qura bilər", - deyə Türkiyə Beynəlxalq Strateji Araşdırmalar Mərkəzinin (USAK) eksperti Kamer Kasım şənbə günü Ankaradan telefonla Trend -a bildirib.
Rəsmi Yerevan qondarma erməni soyqırımı məsələsində Ermənistanın mövqeyinin dəyişdiyini bildirir.
Ermənistan xarici işlər naziri Edvard Nalbandyan "erməni soyqırımı" iddialarının Ermənistanla Türkiyə arasında yaradılcaq Müştərək Tarix Komissiyası tərəfindən araşdırılmasının mümkün olduğunu bildirib. Bu barədə Türkiyənin "Zaman" qəzeti məlumat verib.
Ermənistan Türkiyənin sələfi olan Osmanlı imperiyasının 1915-ci ildə ermənilərə qarşı soyqırım həyata keçirdiyini iddia edir. Soyqırım iddialarını dünyada tanıtmağa çalışan Ermənistan və erməni lobbisi bütün dünyada Türkiyəyə qarşı kampaniya aparır.
İndiyə qədər Ermənistan, Türkiyə tərəfindən təklif olunan və erməni soyqırımı iddialarının tarixi faktlar əsasında araşdırılmasını nəzərda tutan Türkiyə-Ermənistan müştərək komissiyasının yaradılmasını qəbul etmirdi. Ermənistan qondarma soyqırım iddialarının tarixi həqiqət olduğunu və araşdırmaya ehtiyac olmadığını bildirirdi.
Ermənistanla Türkiyə arasındakı əlaqələr 1993-cü ildən etibarən kəsilib. Buna səbəb Ermənistanın beynəlxalq aləmdə qondarma erməni soyqırımı iddiaları ilə Türkiyəyə qarşı kampaniya aparması, Türkiyənin ərazi bütövlüyünü tanımaması və Azərbaycanın 20 % ərazisini işğal etməsi olub. Bu ilin sentyabr ayının 6-da Avropa fudbol çempionatı çərçivəsində keçirilən Ermənistan-Türkiyə oyununa Ermənistan prezidenti Serj Sarkisyan tərəfindən Yerevana dəvət edilən Türkiyə prezidenti Abdulla Gül dəvəti qəbul edərək Yerevana getdi. Gülün bu səfərindən sonra iki ölkə arasında münasibətlərin normallaşdırılması üçün diplomatik səylər davam etdirilir. Ermənistan və Türkiyənin yüksək səviyyəli rəsmiləri arasında keçirilən son ikitərəfli görüş dünən Qara Dəniz İqtisadi Əməkdaşlıq Təşkilatının xarici işlər nazirlərinin toplantısı çərçivəsində İstanbula gələn Nalbandyanla Türkiyə xarici işlər naziri Babacan arasında baş tutub.
Avropalı ekspert Amanda Akçakoca hesab edir ki, Ermənistanın Müştərək Tarix Komissiyasının yaradılmasına normal yanaşması iki ölkə arasındakı əlaqələr baxımından böyük əhəmiyyət daşısa da, sərhədlərin açılması üçün yetərli addım deyil. "Sərhədlərin açılması və normal diplomatik münasibətlərin qurulması üçün Ermənistan yazılı şəkildə Türkiyənin şərq sərhədlərini tanıdığını açıqlamalıdır", - deyə Avropa Siyasət Mərkəzinin (European Policy Center) eksperti Akçakoca şənbə günü Brüsseldən elektron poçtla Trend -a bildirib. Ekspertin fikrincə, Türkiyənin Qarabağ probleminin həllində Ermnistana təsir etmək gücü yoxdur. "Qarabağ probleminin həlli Rusiyanın əlindədir", - deyə Akçakoca bildirib.
Avropalı ekspert Nicolas Tavitian (Nikolas Tavitiyan) da Türkiyənin Ermənistanla əlaqələrini düzəltmək üçün Qarabağ probleminin həllini gözləməyəcəyini hesab edir. "Türkiyənin daha çox gözləməsi üçün heç bir səbəb yoxdur və bütün ölkələr kimi Türkiyə də Ermənistanla münasibətlərin normallaşdırılmasında öz maraqlarından çıxış edəcək", - deyə Brüsseldəki Inside Europe adlı erməni araşdırmaları mərkəzinin direktoru Tavitian şənbə günü elektron poçtla Trend -a bildirib.
Türkiyəli ekspert Kamer Kasım hesab edir ki, Türkiyə-Ermənistan sərhədlərinin açılmasında Qarabağ probleminin həlli prosesinin hansı dərəcədə həlledici olması Azərbaycan və Türkiyə arasındakı razılaşmalara əsasən müəyyənləşdiriləcək.
"Türkiyə Ermənistanla quru sərhədlərinin açılması üçün həm "soyqırım" məsələsinin, həm sərhədlərinin Ermənistan tərəfindən tanınmasının, həm də Qarabağ probleminin ədalətli həllinin ilkin şərt qalmasında təkid etməlidir", - deyə Kasım bildirib.
