Azərbaycan, Bakı, 01 dekabr / Trend , müxbir A.Hüseynbala/ Azərbaycanın Müsavat Partiyası müxalifətin daha geniş tərkibdə əməkdaşlığı üçün layihə hazırlayıb.
"Biz Müxalifətin Əməkdaşlıq Mərkəzinə (MƏM) daxil olan siyasi təşkilatlarla əməkdaşlığı davam etdirməyin və quruma digər qüvvələrin qoşulmasını arzulayırıq",- bazar ertəsi Trend -a MƏM- də təmsil olunan Müsavat Partiyası Mərkəzi İcra Aparatının rəhbəri Arif Hacılı bildirib.
Trend - un arayışı: Müxalifətin Əməkdaşlığı Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar üzündən, müxalifətin geniş koalisiyasının yaranması baş tutmur.
Hacılının sözlərinə görə, Müsavat Partiyası Azərbaycanda fəaliyyət göstərən bütün siyasi qüvvələrin, ictimai təşkilatların, hətta ayrı-ayrı fərdlərin birliyə qoşulması təklifini irəli sürüb. "Milli Birlik Hərəkatının lideri Lalə Şövkət də bir müddət əvvəl buna bənzər bir model təklif edib", - Hacılı vurğulayıb.
Müsavat funksioneri deyib ki, indi müzakirə olunan digər məsələ müttəfiqlik münasibətləri ilə bağlıdır. "Biz hazırladığımız layihəni Azərbaycan Xalq Cəbhəsi Partiyasına (AXCP) təqdim etmişik. Layihə "Azadlıq" blokunda təmsil olunan digər partiyalarla müzakirə olunmalı idi", - Hacılı qeyd edib.
Hacılının sözlərinə görə, layihədə ölkədə demokratik şəraitin yaradılması, kütləvi informasiya vasitələrinə təzyiqlərin qarşısının alınması, seçki qanunvericiliyi sahəsində islahatlara nail olunması, çoxpartiyalı sistemin inkişafı üçün birgə fəaliyyət göstərilməsi, sərbəst toplaşmaq hüququnun bərpası kimi məsələlərdə əməkdaşlığın davam etdirilməsi təklif olunur.
Hacılı deyib ki, Müsavat prezident seçkisində MƏM - də təmsil olunan siyasi təşkilatlarla eyni mövqedən çıxış etməyən partiyalarla da əməkdaşlığın tərəfdarıdır.
"Həmin partiyalarla müttəfiq olmadan əməkdaşlıq mümkündür və onların MƏM-ə cəlb olunmasını arzulayırıq. Amma biz bunu şərt kimi irəli sürməmişik", - Müsavat nümayəndəsi bildirib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında Qəmbər səs çoxluğu ilə Müsavat Partiyasının başqanı seçilib.
Qəmbər Azərbaycan parlamentinin spikeri (1992-1993 -cü illərdə) və 2003 - cü ildə keçirilmiş prezident seçkisində prezidentliyə namizəd olub. Partiya 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
