Azərbaycan, Bakı, 02 oktyabr / Trend , müxbir T.Cəfərov/
İranın Şərqi Azərbaycan vilayətinin ostandarı Əlirza Beygi bildirib ki, Təbriz və Naxçıvan Muxtar Respublikası (NMR) sakinləri yaxın günlərdə adi prosedur qaydaları keçmədən öz şəxsi avtomobilləri ilə qarşı tərəfə səfər edə biləcəklər. Bu barədə İranın İSNA xəbər agentliyi məlumat yayıb.
Beygi əlavə edib ki, bununla bağlı yaxın günlərdə Şərqi Azərbaycan viyaləti və NMR arasında razılaşma imzalanaraq icra olunacaq. "Razılaşmaya əsasən avtomobillər üçün nəzərdə tutulmuş prosedur qaydalar Təbriz şəhəri və Naxçıvan MR sakinləri üçün ləğv olunacaq", - deyə Beygi deyib.
O, bu razılaşmanın hər iki tərəf üçün faydalı olduğunu və Təbrizin iqtisadi inkişafında mühüm rol oynadığını bildirib. "Razılaşmanın icrası ilə Naxçıvan MR sakinləri İrana səfər üçün, xüsusilə də müalicə məqsədi ilə səfərlərdə heç bir problemlə üzləşməyəcəklər", - Beygi deyib.
"Çalışırıq ki, buna bənzər razılaşmaları digər qonşu ölkələrlə də həyata keçirək", - o əlavə edib.
Məqalə müəllifi ilə əlaqə ünvanı: [email protected]