Azərbaycan, Bakı, 1 sentyabr /Trend, müxbir T.Hacıyev/
Azərbaycanın müxalif Vətəndaş və İnkişaf (VİP), Liberal (ALP) və Yaşıllar (AYP) partiyalarının seçki blokunun namizədlərinə treninqlər keçiriləcək. Bu barədə çərşənbə günü Trend-ə VİP sədri Əli Əliyev bildirib.
"Bazar günü VİP Ali Məclisinin iclası keçiriləcək. İclasda blok tərəfindən irəli sürülmüş namizədlər də iştirak edəcəklər. Namizədlərə treninqlər keçiriləcək", - Əliyev əlavə edib.
Partiya sədri treninqlər keçirilməsi zərurətinin nə üçün yarandığı məsələsinə də aydınlıq gətirib.
"Seçki bloku tərəfindən namizədlərin irəli sürülməsi kifayət qədər mürəkkəb prosesdir. Namizədlər prosedurların mürəkkəb olmasından şikayətlənirlər. Ona görə də partiyaların seçki üzrə mütəxəssisləri namizədlər ünün treninqlər keçirəcəklər. Bundan əlavə, blokun treninq mərkəzi də yaradılacaq", - Əliyev deyib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Əliyev blokun razılaşdırdığı namizədlərin sayını da açıqlayıb.
"İndiyə qədər artıq 75 seçki dairəsi üzrə namizədlərin birgə irəli sürülməsi ilə bağlı razılıq əldə etmişik. Hər üç partiyanın bu gün keçiriləcək iclasında namizədlərin hər biri barədə fərdi qaydada qərar qəbul olunacaq", - Əliyev qeyd edib.
Avqustun 25-də VİP və ALP seçki bloku yaratdıqlarını elan ediblər. Daha sonra Yaşıllar Partiyası da bu bloka qoşulacağını bildirib. Hələ ki seçki blokunun adı ilə bağlı yekdil qərar qəbul olunmayıb.