Azərbaycan, Bakı, 3 sentyabr /Trend, müxbir S.Ağayeva/
Azərbaycan Kaliforniyada Beverli Hills Şəhər Gününün sponsorlarından biri kimi çıxış edib.
Bu il 2 sentyabr tarixi ABŞ yazılış variantında Beverli Hillsin poçt indeksinin (9-02-10) rəqəmləri ilə üst-üstə düşür. Azərbaycanın Los-Ancelesdəki Baş Konsulluğunun verdiyi məlumata görə, şəhərdəki bayram şənlikləri məhz bu nadir təsadüflə bağlı təşkil olunub. 90210 poçt indeksi eyniadlı populyar teleserialda reklam edilib.
Bayram şənliklərinin rəsmi hissəsini Beverli Hillsin meri Cimmi Delşad və teleaparıcı Larri Kinq aparıb, musiqili proqramda isə məşhur ifaçılar Nataşa Bedinqfild və Neo çıxış ediblər. Tədbir ABŞ mətbuatında geniş şəkildə işıqlandırılıb.
Bayramın sponsorlarından biri Azərbaycanın Los-Ancelesdəki Baş Konsulluğu olub.
