Hollandiyada siyasi mühacirətdə olan Canmirzə Mirzəyev ailəsi ilə birlikdə həmin ölkədən deportasiya oluna bilər. Trend in Canmirzə Mirzəyelə telefon bağlantısı zamanı məlum olub ki, bu problemin yaranmasına onun Avropa İnsan Hüquqları Məhkəməsinə müraciət etmək üçün bəzi sənədlərlə bağlı müvəqqəti Azərbaycana qayıtmaq barədə qərara gəlməsi olub.
Hollandiyanın Xarici İşlər Nazirliyinin mühacirlərlə iş üzrə müvafiq bölməsi Mirzəyevə ya ölkədə qalmaq, ya da ölkəni birdəfəlik tərk etmək barədə seçim etmək təklifi ortaya çıxıb. C.Mirzəyevin sözlərinə görə, hər hansı xarici ölkəyə mühacirət edən şəxsin həmin ölkədə 5 il yaşaması məcburidir. Bu müddət başa çatmamış mühacir ölkəni tərk edərsə, həmin ölkə tərəfindən ona verilmiş siyasi mühacir statusu əlindən alınır. C.Mirzəyev Hollandiyanın Xarici İşlər Nazirliyinin mühacirlərlə iş üzrə müvafiq bölməsinə müraciət edərək müvəqqəti vətənə dönmək istədiyini bildirib. Lakin həmin bölmədən C.Mirzəyevə qaneedici cavab verilməyib. Bildirilib ki, əgər Hollandiyanı tərk edərsə, onunla birlikdə ailəsi də həmin ölkə tərəfindən əldə etdiyi siyasi sığınacağı həmişəlik itirəcək.
Canmirzə Mirzəyev seçim qarşısında qalıb. Onun Bakıda fəaliyyət göstərən hüquqları müdafiə komitəsi isə belə qərara alıb ki, C.Mirzəyevin hələlik həmin ölkədə qalıb mühacirlik həyatını davam etdirməsi daha məqsədəuyğundur. Sənədləri toplayıb Avropa İnsan Hüquqları Məhkəməsinə göndərmək məsələsi ilə müdafiə komitəsi də məşğul ola bilər.
Lakin Canmirzə Mirzəyev hələlik qəti qərara gəlməyib. Əgər o, inadından dönməyib vətənə qayıtmağı seçsə, bu zaman ailəsinin də Hollandiyadan deportasiya olunması gözlənilir.
Qeyd edək ki, II ranq kapitan, Ali Hərbi Dənizçilik Məktəbinin keçmiş rəisi Canmirzə Mirzəyev admiral Eduard Hüseynovun qətlinin sifarişçisi kimi 2000-ci ildə həbs edilərək 8 il müddətinə azadlıqdan məhrum edilmişdi. 10 may 2004-cü il tarixdə ölkə başçısı tərəfindən əfv olunaraq azadlığa buraxılandan sonra bəraət əldə etmək üçün əvvəlcə yerli məhkəmə orqanlarına, sonra isə Avropa İnsan Hüquqları Məhkəməsinə müraciət edib. Ailəsi ilə birlikdə Hollandiyadan siyasi sığınacaq alıb və 1 il 9 aydır ki, həmin ölkədə mühacirətdədir.
