Salyan rayonun Dayıkənd kəndinin 14 yaşlı sakini Əjdər Əsgərov Salyan rayon Mərkəzi Xəstəxanasına pnevmoniya əlamətləri ilə gətirilsə də, hər ehtimala qarşı müayinə üçün Bakıdakı xəstəxanaya göndərilib, - deyə Salyan rayon Mərkəzi Xəstəxanasının baş həkimi İbrahim Cəfərov bildirdi.
Bakıdakı laboratoriyada isə analizlərin nəticələrinə görə, onun qanında quş qripi virusu tapılmayıb. Lakin Azərbaycan Səhiyyə Nazirliyi rəsmilərinin açıqlamalarına görə, dəqiq diaqnoz üçün hər ehtimala qarşı London laboratoriyalarına müraciət olunacaq.
Xatırladaq ki, ötən il bu təhlükəli virusdan Azərbaycanda dünyasını dəyişən 5 nəfərdən 3-ü Salyanın Dayıkənd kəndinin yeniyetmə sakinləri olub.
Maraqlıdır ki, bu dəfə də şübhəli diaqnozla xəstəxanaya yerləşdirilən 14 yaşlı Əjdar Ələsgər oğlu Əsgərov ötən il təhlükəli virusdan özü və sonradan 19 yaşlı qardaşı vəfat etmiş 18 yaşlı Nabat Əsgərovanın əmisi uşaqlarıdır. Baş həkim İ.Cəfərovun bildirdiyinə görə, həkim briqadası hər gün adıçəkilən kənddə evbəev reydlərə keçirsə də, yerli əhalidə təhlükəli xəstəliklə bağlı əlamətlər aşkarlanmayıb.
Salyan rayon Baytarlıq İdarəsinin rəisi Məhəmməd Əsgərov isə bildirdi ki, Salyanınn Dayıkənd kəndində ev quşları arasında kütləvi tələfat müşahidə edilməyib. Lakin rayonun bütün ərazisində, o cümlədən həmin kənddə ayda 2 dəfə sero-monitorinqlər keçirilərək, analiz nümunələri yerli və Bakıdakı laboratoriyalarda tədqiq edilsə də, bu günədək H5n1 virusu aşkarlanmayıb.
